റിയാദ്: യാചകവൃത്തി തുടച്ചു മാറ്റാൻ പദ്ധതികൾ തയ്യാറാക്കി സഊദി അറേബ്യ. യാചകരെ കണ്ടെത്തുന്നതിനും അറസ്റ്റ് ചെയ്യുന്നതിനും വിവിധ സോഷ്യൽ മീഡിയ ഔട്ട്ലെറ്റുകളും കർശനമായി നിരീക്ഷിക്കുമെന്ന് പബ്ലിക് സെക്യൂരിറ്റി വക്താവ് ജനറൽ സാമി അൽ ശുവൈരിഖ് പറഞ്ഞു. നിയമവിരുദ്ധമായ ഭിക്ഷാടന പ്രവൃത്തി അതിന്റെ എല്ലാ രൂപങ്ങളിലും പ്രകടനങ്ങളിലും സോഷ്യൽ മീഡിയ ഉൾപ്പെടെ ലഭ്യമായ എല്ലാ മാർഗങ്ങളിലൂടെയും നിരീക്ഷിക്കുമെന്ന് അദ്ദേഹം പറഞ്ഞു.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
പൗരന്മാരും താമസക്കാരും ദരിദ്രർക്ക് സഹായം നൽകാൻ ആഗ്രഹിക്കുന്നുവെങ്കിൽ ഉറപ്പ് നൽകുന്ന അംഗീകൃത പ്ലാറ്റ്ഫോമുകളിലൂടെ ദാനധർമ്മങ്ങൾ നൽകാൻ ശുവൈരിഖ് ആവശ്യപ്പെട്ടു. ഭിക്ഷാടനം പ്രോത്സാഹിപ്പിക്കരുതെന്ന് അദ്ദേഹം പൊതുജനങ്ങളോട് ആഹ്വാനം ചെയ്തു.
ചൊവ്വാഴ്ച മുതൽ ഭിക്ഷാടന വിരുദ്ധ നിയമം സുരക്ഷാ ഉദ്യോഗസ്ഥർ കർശനമായി നടപ്പാക്കാൻ തുടങ്ങിയിട്ടുണ്ട്. മന്ത്രിമാരുടെ കൗൺസിൽ അംഗീകരിച്ച പുതിയ ഭിക്ഷാടന വിരുദ്ധ നിയമം അനുസരിച്ച്, ഭിക്ഷാടനം നടത്തുന്നവർക്ക് പരമാവധി ഒരു വർഷത്തെ തടവും 100,000 റിയാൽ പിഴയുമാണ് ശിക്ഷ.
സോഷ്യൽ മീഡിയ പ്ലാറ്റ്ഫോമുകളിലൂടെയുള്ള എല്ലാത്തരം ഭിക്ഷാടനവും ശിക്ഷാർഹമാണ്. ഓൺലൈൻ പോർട്ടലുകൾ വഴി എന്തെങ്കിലും കാരണങ്ങൾക്ക് പണത്തിനായി യാചിക്കുന്നത് നിരോധിച്ചിരിക്കുന്നു, കൂടാതെ ഓൺലൈൻ ഭിക്ഷാടനത്തിനുള്ള പിഴ 6 മാസം വരെ തടവും 50,000 റിയാൽ പിഴയുമാണ്.
ആഭ്യന്തര മന്ത്രാലയവും മാനവ വിഭവശേഷി, സാമൂഹിക വികസന മന്ത്രാലയവുമാണ് പിഴ ചുമത്താൻ ചുമതലപ്പെടുത്തിയിരിക്കുന്നത്. ഭിക്ഷാടകർ വിദേശികൾ ആണെങ്കിൽ ജയിൽ ശിക്ഷ അനുഭവിച്ച് പിഴയടച്ചാൽ അവരെ നാട് നടത്തുകയും ചെയ്യും.
