ജിദ്ദ: അൽ അബീർ മെഡിക്കൽ സെന്ററിന്റെ ആഭിമുഖ്യത്തിൽ അന്താരാഷ്ട്ര വനിത ദിനം ആഘോഷിച്ചു. പാചക മത്സരം, പ്രസംഗങ്ങൾ, പ്രമേയ ഗാനങ്ങൾ, മറ്റ് കലാരൂപങ്ങൾ എന്നിങ്ങനെ വ്യത്യസ്തമായ പ്രവർത്തനങ്ങളും മത്സരങ്ങളുമായി അബീർ മെഡിക്കൽ ഗ്രൂപ്പ് അന്താരാഷ്ട്ര വനിതാ ദിനം പ്രത്യേകമായി ആഘോഷിച്ചു.
സഊദിയുടെ പ്രഥമ വനിത കൊമേഴ്സ്യൽ പൈലറ്റ് യാസ്മീൻ അൽ മൈമാനി പരിപാടിയുടെ മുഖ്യാതിഥിയായിരുന്നു, യുവാക്കൾക്ക് അവരുടെ സ്വപ്നങ്ങൾ എങ്ങനെ പിന്തുടരാം എന്നതിനെക്കുറിച്ച് അവർ പ്രചോദനാത്മകമായ സെഷനുകൾ നൽകി. ചലച്ചിത്ര നിർമ്മാതാവും ബ്രോഡ്കാസ്റ്റ് ജേണലിസ്റ്റും റേഡിയോ അവതാരകയുമായ സമീറ അസീസും പരിപാടിയെ അഭിനന്ദിക്കാൻ എത്തിയിരുന്നു.
പുതിയ ലോകത്തോട് മത്സരിച്ച് വിസ്മയകരമായ പരിവർത്തനത്തിന്റെ പാതയിൽ സഞ്ചരിക്കുന്ന രാഷ്ട്രത്തെ വികസിപ്പിക്കാനുള്ള കിരീടാവകാശിയുടെ മഹത്തായ ശ്രമങ്ങൾക്ക് പിന്തുണ നൽകുന്ന പുതിയ സഊദി യുടെ മുഖമായ സ്ത്രീകളായി തങ്ങളുടെ ശക്തി തെളിയിക്കാൻ ജീവിതത്തിന്റെ എല്ലാ തുറകളിലുമുള്ള സ്ത്രീകളും ഉണ്ടായിരുന്നു. മൂല്യങ്ങളും സമഗ്രതയും സത്യസന്ധതയുമാണ് എന്നെന്നും ഈ രാജ്യത്തിൻറെ മുഖമുദ്ര എന്നതിന് അടിവരയിട്ടുകൊണ്ടാണ് പ്രാസംഗികർ വാക്കുകൾ അവസാനിപ്പിച്ചത്
അബീർ എല്ലായ്പ്പോഴും അവരുടെ തൊഴിലാളികൾക്കിടയിൽ വനിതാ നേതാക്കളെ പ്രോത്സാഹിപ്പിച്ചിട്ടുണ്ടെന്നും സ്ത്രീകളുടെ വികസനത്തിന് അനുയോജ്യവും സുസ്ഥിരവുമായ മാറ്റങ്ങൾ കൊണ്ടുവരാൻ താൽപ്പര്യമുണ്ടെന്നും വൈസ് പ്രസിഡന്റ് ഡോ. ജെംഷിത്ത് തന്റെ തീം പ്രസംഗത്തിൽ പറഞ്ഞു.
അബീർ എക്സിക്യൂട്ടീവ് ഡയറക്ടർ ഡോ. അഹമ്മദ് ആലുങ്ങൽ കൂടുതൽ കഴിവുകൾ വികസിപ്പിക്കുന്നതിനും വൈദ്യശാസ്ത്രത്തിലും ശാസ്ത്രത്തിലും വിദ്യാഭ്യാസത്തിലെ പുതിയ അവസരങ്ങൾ മികച്ച രീതിയിൽ വിനിയോഗിക്കുന്നതിനും പ്രേക്ഷകരെ പ്രചോദിപ്പിച്ചു.
അബീറിന്റെ ചരിത്രത്തിൽ സ്ത്രീകളെ വകുപ്പുകളുടെ തലവന്മാരായി നിയമിക്കുന്നതിനെ അബീർ എങ്ങനെയാണ് പിന്തുണച്ചതെന്ന് പ്രോഗ്രാം ഡയറക്ടറും മാർക്കറ്റിംഗ് ആന്റ് പേഷ്യന്റ് എക്സ്പീരിയൻസ് ഡയറക്ടറുമായ ഡോ. ഇമ്റാൻ വിശദീകരിച്ചു.
ഡോ. സാജിറ പുനത്തിൽ, ഡോ. അനിത, ഡോ.സിമിൻ എന്നിവർ യഥാക്രമം വന്ധ്യത, കുട്ടികൾക്കുള്ള ചില വീട്ടുവൈദ്യങ്ങളുടെ അപകടങ്ങൾ, ചർമ്മസൗന്ദര്യ സംരക്ഷണം എന്നീ വിഷയങ്ങളിൽ ഉപകാരപ്രദമായ സെഷനുകൾ നൽകി. സദസ്സിന്റെ ചോദ്യങ്ങൾക്കും അവർ ഉത്തരം നൽകി.
മലബാർ അടുക്കള ഫെയിം കുബ്ര ലത്തീഫ്, വനിതാ മെന്റർ സലീന മുസാഫിർ, ജെ സി ഡബ്ല്യു സി ചീഫ് അനീസ ബൈജു എന്നിവർ വനിതാ പ്രവർത്തനങ്ങൾക്ക് നേതൃത്വം നൽകി. ആസ്വാദകർക്ക് സ്വാദിഷ്ടമായ ഭക്ഷണം വിളമ്പി.ലോകത്തിലെ സ്ത്രീകളുടെ പ്രാധാന്യത്തെക്കുറിച്ച് ജലീൽ ആലുങ്കൽ സംസാരിച്ചു മെഡിക്കൽ സെഷനുകൾ അവസാനിപ്പിച്ചു
