ദുബായ്: ജ്യോതിശാസ്ത്രം, ഗണിതശാസ്ത്രം എന്നീ മേഖലകളിലെ സംഭാവനകളുടെയും നേട്ടങ്ങളുടെയും നീണ്ട യാത്രയ്ക്ക് ശേഷം കുവൈത്തിലെ മുതിർന്ന ജ്യോതിശാസ്ത്രജ്ഞനും കാലാവസ്ഥാ നിരീക്ഷകനുമായ ഡോ: സാലിഹ് അൽ ഒജൈരി (102) വ്യാഴാഴ്ച അന്തരിച്ചു. കുവൈത്തിലെയും അറബ് ലോകത്തെയും ഏറ്റവും പരിചയസമ്പന്നനും അറിയപ്പെടുന്നതും ഉന്നതനായ ജ്യോതിശാസ്ത്രജ്ഞൻ എന്ന നിലയിൽ അൽ ഒജൈരി പ്രാദേശികവും അന്തർദേശീയവുമായ ശാസ്ത്ര സമ്മേളനങ്ങളിലെ ശ്രദ്ധേയനായ സാന്നിധ്യമായിരുന്നു.
1920 ജൂൺ 23-ന് ജനിച്ച അൽ ഒജൈരി, 1970-കളുടെ തുടക്കത്തിൽ കുവൈത്തിലെ ആദ്യത്തെ നിരീക്ഷണാലയത്തിലെ ജ്യോതിശാസ്ത്രവും കാലാവസ്ഥാ ശാസ്ത്രവും ഇദ്ദേഹത്തിന്റെ മേൽനോട്ടത്തിലായിരുന്നു. ജ്യോതിശാസ്ത്രത്തിലും ഗണിതശാസ്ത്രത്തിലും നിരവധി പുസ്തകങ്ങളും ലേഖനങ്ങളും എഴുതിയിട്ടുണ്ട്, കൂടാതെ നിരവധി സെമിനാറുകളും പ്രഭാഷണങ്ങളും പ്രത്യേക ശാസ്ത്ര കേന്ദ്രങ്ങളിലും ക്ലബ്ബുകളിലും അദ്ദേഹം അവതരിപ്പിച്ച പ്രോഗ്രാമുകൾക്കും നേതൃത്വം നൽകി.
ജ്യോതിശാസ്ത്രത്തെക്കുറിച്ച് അറബ് ലോകത്തിന് സംഭാവനയായി നിരവധി പുസ്തകങ്ങൾ അദ്ദേഹം രചിച്ചിട്ടുണ്ട്, കൂടാതെ 1952 ൽ ആദ്യമായി പുറത്തിറക്കിയ കലണ്ടറിന്റെ രൂപീകരണത്തിന് പിന്നിലും പ്രവർത്തിച്ചിട്ടുണ്ട്. തീയതികളും പ്രാർത്ഥനാ സമയങ്ങളും പിന്തുടരുന്നതിന് കുവൈത്തിലെ ഏറ്റവും ആധികാരികവും ഉപയോഗിക്കുന്നതുമായ കലണ്ടറായി കണക്കാക്കപ്പെടുന്നു ഇത്. അദ്ദേഹത്തിന്റെ പേരിൽ നിരവധി പ്രസിദ്ധീകരണങ്ങളും ഗവേഷണങ്ങളും ലൈബ്രറിയും ഉണ്ട്. 1981-ലും 1988-ലും ജ്യോതിശാസ്ത്രരംഗത്തെ അദ്ദേഹത്തിന്റെ സംഭാവനകളെ മാനിച്ച് അൽ ഒജൈരിക്ക് കുവൈത് യൂണിവേഴ്സിറ്റി ഓണററി ഡോക്ടറേറ്റ് നൽകി ആദരിച്ചു.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, അനുശോചനം രേഖപ്പെടുത്തി. “ഞങ്ങൾ ആദരിക്കുകയും അഭിമാനിക്കുകയും ചെയ്യുന്ന ജ്യോതിശാസ്ത്ര മേഖലയിലെ ശാസ്ത്രത്തിന്റെയും അറിവിന്റെയും പ്രതീകമായ ജ്യോതിശാസ്ത്രജ്ഞൻ ഡോ: സാലിഹ് അൽ ഒജൈരിയുടെ മരണത്തിൽ കുവൈത്തിലെയും ജിസിസിയിലെയും ജനങ്ങൾക്ക് ഞങ്ങളുടെ അനുശോചനം”, ഷെയ്ഖ് മുഹമ്മദ് ട്വീറ്റ് ചെയ്തു.
