റിയാദ്: 2021 ലെ ആരോഗ്യ സുരക്ഷ സൂചികയിൽസുരക്ഷാ സൂചകങ്ങളിൽ അറബ് ലോകത്ത് മുന്നേറി ഖത്തറും സഊദി അറേബ്യയും. ഖത്തർ അറബ് ലോകത്ത് ഒന്നാം സ്ഥാനത്തും സഊദി അറേബ്യ രണ്ടാം സ്ഥാനത്തുമെത്തി. 100 ൽ 48.7 പോയിന്റുമായി ആഗോളതലത്തിൽ ഖത്തർ 49-ാം സ്ഥാനത്തും 44.9 പോയിന്റുമായി സഊദി അറേബ്യ 61-ാം സ്ഥാനത്തും 44.6 പോയിന്റുമായി മറ്റൊരു അറബ് രാജ്യമായ ജോർദാൻ ആഗോളതലത്തിൽ 66-ാം സ്ഥാനത്തും എത്തി.
അറബ് ലോകത്ത് യു.എ.ഇ നാലാമതും തുടർന്ന് ഒമാൻ, കുവൈറ്റ്, ബഹ്റൈൻ എന്നീ രാജ്യങ്ങളുമാണുള്ളത്. സിറിയ, യെമൻ, സൊമാലിയ എന്നീ രാജ്യങ്ങളാണ് ആരോഗ്യ സുരക്ഷാ സൂചികയിൽ ഏറ്റവും പിന്നിൽ.
6 വിഭാഗങ്ങളും 37 സൂചകങ്ങളും അനുസരിച്ച് 195 രാജ്യങ്ങളുടെ ആരോഗ്യ നടപടികളും കഴിവുകളുമാണ് അന്താരാഷ്ട്ര സൂചിക വിലയിരുത്തിയത്. ലോക രാജ്യങ്ങൾ ഇപ്പോഴും പകർച്ചവ്യാധികളെ നേരിടാൻ തയ്യാറായിട്ടില്ലെന്ന് ഫലങ്ങൾ ചൂണ്ടിക്കാണിച്ചു.
എല്ലാ രാജ്യങ്ങളിലെയും ശരാശരി ആഗോള സ്കോർ 100 ൽ 38.9 ൽ മാത്രമാണ് എത്തിയത്. ഒരു രാജ്യവും ഉയർന്ന വിഭാഗത്തിൽ രജിസ്റ്റർ ചെയ്തിട്ടില്ലെന്നും പകർച്ചവ്യാധികളെ നേരിടാനുള്ള പരമാവധി തയ്യാറെടുപ്പും തയ്യാറെടുപ്പും ഒരു രാജ്യങ്ങളും നടത്തിയിട്ടില്ലെന്നതാണിത് സൂചിപ്പിക്കുന്നതെന്നും സി എൻ എൻ റിപ്പോർട്ട് ചെയ്യുന്നു.
ലോകത്തിന്റെ ഒരു ഭാഗത്ത് രോഗം പടരുമ്പോൾ, വരുമാനവും ഭൂമിശാസ്ത്രപരമായ സ്ഥാനവും പരിഗണിക്കാതെ എല്ലാ രാജ്യങ്ങളും അപകടത്തിലാകാൻ സാധ്യതയുണ്ടെന്ന് കൊറോണ മഹാമാരി തെളിയിച്ചതായും റിപ്പോർട്ട് സൂചിപ്പിച്ചു.
