റിയാദ്: രാജ്യത്ത് വിവിധ അഴിമതി കേസുകളിൽ ഗവർണർ, ജഡ്ജി, കേണൽ എന്നിവർ ഉൾപ്പെടെ നിരവധി പേർക്കെതിരെ ശിക്ഷ വിധിച്ചു. റിയാദ് ക്രിമിനൽ കോടതിയാണ് വ്യത്യസ്ത കേസുകളിൽ വിധി പുറപ്പെടുവിച്ചത്. പ്രതികൾക് ജയിൽ ശിക്ഷയും കനത്ത പിഴയും വിധിച്ചിട്ടുണ്ട്. കൈക്കൂലി, വ്യാജരേഖ ചമയ്ക്കൽ, കള്ളപ്പണം വെളുപ്പിക്കൽ, അധികാര ദുർവിനിയോഗം, പൊതുഫണ്ട് ദുരുപയോഗം തുടങ്ങിയ അഴിമതി കുറ്റങ്ങളിലാണ് വിവിധ ഗവണ്മെന്റ് ഉദ്യോഗസ്ഥരാടക്കം നിരവധി പ്രമുഖർക്കെതിരെ ശിക്ഷ വിധിച്ചത്.
ഒരു പ്രദേശത്തിന്റെ ഗവർണർ, ജഡ്ജി, കേണൽ, മേജർ എന്നിവർ ഉൾപ്പെടെയുള്ളവരാണ് പ്രതികളെന്ന് അഴിമതി വിരുദ്ധ അതോറിറ്റി (നസാഹ) ട്വിറ്റർ അക്കൗണ്ടിൽ വ്യക്തമാക്കി. റിയാദ് ക്രിമിനൽ കോടതി സാമ്പത്തിക, ഭരണപരമായ അഴിമതി കേസുകൾ പരാമർശിച്ച ശേഷമാണ് വിധി പുറപ്പെടുവിച്ചതെന്ന് അതോറിറ്റിയുടെ ഔദ്യോഗിക വൃത്തങ്ങൾ പറഞ്ഞു.
ഒരു പ്രദേശത്തെ ഗവർണർ കൈക്കൂലി വാങ്ങുകയും പണം തട്ടിയെടുക്കുകയും ചെയ്തതിന് മൂന്ന് വർഷം തടവും 25,000 റിയാൽ പിഴയുമാണ് വിധിച്ചത്. കൈക്കൂലി, ഭരണപരമായ ദുരുപയോഗം, സ്ഥാനത്തിന്റെ സത്യസന്ധത ലംഘിക്കൽ തുടങ്ങിയ കുറ്റങ്ങൾക്ക് ശിക്ഷിക്കപ്പെട്ട ഒരു ജഡ്ജിക്ക് 10 വർഷം തടവും 300,000 റിയാൽ പിഴയും വിധിച്ചിട്ടുണ്ട്.
തടവുകാരെ കടത്തിക്കൊണ്ടുവന്നതിനും ഇടനിലക്കാരന്റെ അഭ്യർത്ഥന നിറവേറ്റുന്നതിനും, വ്യാജരേഖ ചമച്ചതിനും ഒളിച്ചോടിയവരുടെയും അവന്റെ ഇടനിലക്കാരന്റെ വിവരങ്ങളുടെയും മറച്ചുവെച്ചതിനും ഒരു പോലീസ് ഉദ്യോഗസ്ഥന് കോടതി ഏഴ് വർഷം തടവും 60,000 പിഴയും വിധിച്ചു. ഒരു മുനിസിപ്പാലിറ്റിയിലെ എക്സ്പ്രൊയേഷൻ ഡിപ്പാർട്ട്മെന്റ് ഡയറക്ടർക്ക് 11 വർഷത്തെ തടവും 350,000 റിയാൽ പിഴയും വിധിച്ചു. ഇദ്ദേഹത്തിന് കൈകൂലി നൽകിയ സ്വദേശിക്ക് അഞ്ച് വർഷം തടവും വിധിച്ചിട്ടുണ്ട്.
വിദ്യാഭ്യാസ മന്ത്രാലയവുമായി കരാറുള്ള ഒരു കമ്പനിയിൽ ജോലി ചെയ്യുന്ന ഒരു പ്രവാസിക്ക് മൂന്ന് വർഷം തടവും 100,000 റിയാൽ പിഴ, കമ്പനിക്ക് നൽകേണ്ട സാമ്പത്തിക തുകകൾ വിതരണം ചെയ്യുന്നതിനായി വ്യാജ സർട്ടിഫിക്കറ്റുകൾ ഒപ്പിട്ടതിന് പകരമായി മന്ത്രാലയത്തിലെ ജീവനക്കാരിൽ ഒരാൾക്ക് 300,000 രൂപ കൈക്കൂലിയായി വാഗ്ദാനം ചെയ്തതിന് സ്വദേശിയും ശിക്ഷിക്കപ്പെട്ടു. കൈക്കൂലി, കള്ളപ്പണം വെളുപ്പിക്കൽ എന്നീ കുറ്റങ്ങൾക്ക് ഒരു അഭിഭാഷകന് ഏഴ് വർഷം തടവും 70,000 റിയാൽ പിഴയും വിധിച്ചു കൈക്കൂലി വാങ്ങിയതിന് പബ്ലിക് പ്രോസിക്യൂഷൻ ഉദ്യോഗസ്ഥന് അഞ്ചര വർഷം തടവും 50,000 റിയാൽ പിഴയും വിധിച്ചു.
കൂടാതെ, ഏതാനും പ്രോസിക്യൂഷൻ ഉദ്യോഗസ്ഥർ, സിവിൽ ഡിഫൻസിലെ കേണൽ റാങ്ക് ഉദ്യോഗസ്ഥൻ, ബിസിനസ് പ്രമുഖർ, ഇവരുടെ ലീഗൽ ഏജന്റ്, മേജർ റാങ്ക് ഉദ്യോഗസ്ഥൻ തുടങ്ങി നിരവധി പേർക്കായി കേസുകളുടെ സ്വഭാവമാനുസരിച്ച് 25,000 റിയാൽ മുതൽ പതിനാറ് ലക്ഷം റിയാൽ വരെ പിഴയും പതിനൊന്നു വർഷം വരെ തടവും വിധിച്ചിട്ടുണ്ട്.
