റിയാദ്: റിയാദ് കെഎംസിസി ന്യൂസനയ്യ ഏരിയ കമ്മിറ്റി ഫലസ്തീൻ ഐക്യദാർഢ്യ സംഗമം സംഘടിപ്പിച്ചു. ന്യൂസനയ്യ ഒയാസിസ് ഹോട്ടൽ ഓഡിറ്റോറിയത്തിൽ വെച്ച് നടന്ന പരിപാടിയിൽ ഏരിയ കമ്മിറ്റി ആക്ടിങ് പ്രസിഡന്റ് നാസർ ആവിലോറ അധ്യക്ഷനായിരുന്നു. ഓർഗനൈസിങ് സെക്രട്ടറി ഷിഫ്നാസ് ശാന്തിപുരം സംഗമം ഉദ്ഘാടനം നിർവ്വഹിച്ചു. ഫലസ്തീനിലെ പോരാളികളായ സഹോദരങ്ങൾക്ക് ഐക്യദാർഢ്യം പ്രഖ്യാപിക്കുകയും അവർക്ക് വേണ്ടി പ്രാർത്ഥിക്കുകയും ചെയ്യേണ്ടത് ഓരോ വിശ്വസിയുടെയും ബാധ്യതയാണെന്ന് അദ്ദേഹം പറഞ്ഞു.
കെഎംസിസി റിയാദ് സെൻട്രൽ കമ്മിറ്റി ഓർഗനൈസിങ് സെക്രട്ടറി സത്താർ താമരത്ത് മുഖ്യ പ്രഭാഷണം നടത്തി. നൂറ്റാണ്ടുകളായി കിരാത യാതനകൾ സഹിക്കുന്ന, സ്വന്തം മണ്ണിനു വേണ്ടി പോരാടുന്ന ഫലസ്തീൻ മക്കൾ അവരുടെ വിശ്വാസത്തിന്റെ ബലം കൊണ്ടാണ് പിടിച്ചു നിൽക്കുന്നതെന്നും അവരുടെ ചെറുത്തു നിൽപ്പും പ്രതിരോധവും പോരാട്ടവും ലോകത്ത് പകരം വെക്കാനില്ലാത്ത ചരിത്രമാണെന്നും അദ്ദേഹം പറഞ്ഞു. മഹാത്മാ ഗാന്ധി, ജവർഹർലാൽ നെഹ്റു, ഇന്ദിര ഗാന്ധി തുടങ്ങിയ ഇന്ത്യൻ നേതാക്കളും എല്ലാ സർക്കാരുകളും ഫലസ്തീനിനെ എന്നും പിന്തുണച്ച ചാരിത്രമാണുള്ളതെന്നും ഇന്ത്യൻ യൂണിയൻ മുസ്ലിം ലീഗ് നേതാവായിരുന്ന ഇ. അഹ്മദ് കേന്ദ്ര വിദേശകാര്യ സഹമന്ത്രിയായിരുന്ന കാലത്ത് ഫലസ്തീൻ സന്ദർശിക്കുകയും ഐക്യദാർഢ്യവും സഹായവും പ്രഖ്യാപിക്കുകയും ചെയ്ത സംഭവം അഭിമാനിക്കാവുന്ന നിമിഷങ്ങളായിരുന്നു എന്നും അദ്ദേഹം കൂട്ടിച്ചേർത്തു. ഏരിയ കെഎംസിസി വൈസ് പ്രസിഡന്റ് ഇക്ബാൽ കവന്നൂർ പ്രമേയയം അവതരിപ്പിച്ചു. നിലവിലെ ഇന്ത്യൻ സർക്കാറിന്റെ നിലപാട് മുൻപ് രാജ്യം ഭരിച്ച സർക്കാറുകളുടെ നിലപാടുകളിൽ നിന്നും വിഭിന്നമാണെന്നും ഫലസ്തീൻ ജനതയോട് ഐക്യപ്പെടുന്ന നിലപാടിലേക്ക് സർക്കാർ തിരിച്ചു വരണമെന്നും പ്രമേത്തിലൂടെ ആവശ്യപ്പെട്ടു. അബൂബക്കർ ഒളവട്ടൂർ ഫലസ്തീൻ ഐക്യദാർഢ്യ ഗാനം ആലപിച്ചു. അബ്ദുൽ ബാസിത് നൂരി ഫലസ്തീൻ ജനതക്ക് വേണ്ടിയുള്ള പ്രാർത്ഥനക്ക് നേതൃത്വം നൽകി.
ഷെറിൻ ഷരീഫ്, അബ്ദുസ്സമദ്, അൻസാർ, യൂനുസ് എന്നിവർ പരിപാടി നിയന്ത്രിച്ചു.ന്യൂ സനയ്യ ഏരിയ കെഎംസിസി ജനറൽ സെക്രട്ടറി മഹദി ഹസൻ കക്കുളങ്ങര സ്വാഗതവും ജോയിന്റ് സെക്രട്ടറി ഫൈസൽ പുത്തൂർമഠം നന്ദിയും പറഞ്ഞു.
