കുവൈത്ത് സിറ്റി: കുവൈത്തില് ഹെറോയിനുമായി യാത്രക്കാരന് പിടിയില്. വിമാനത്താവളത്തില് വെച്ചാണ് എയര് കാര്ഗോ കസ്റ്റംസ് പാകിസ്ഥാന് സ്വദേശിയായ യാത്രക്കാരനില് നിന്നും ഹെറോയിന് പിടിച്ചെടുത്തത്. 70 ഗ്രാം ഹെറോയിനാണ് കണ്ടെത്തിയത്. വിമാനത്താവളത്തില് നടത്തിയ പരിശോധനയിലാണ് ലഹരിമരുന്ന് പിടിച്ചെടുത്തത്. പിടിയിലായ പ്രതിയെ തുടര് നിയമ നടപടികള്ക്കായി ബന്ധപ്പെട്ട വകുപ്പുകള്ക്ക് കൈമാറിയതായി അധികൃതര് അറിയിച്ചു.
വാർത്തകൾ നേരിട്ട് വാട്ട്സാപ്പിൽ ഉടൻ ലഭിക്കാൻ ഇവിടെ ക്ലിക്ക് ചെയ്യുക
കഴിഞ്ഞ ദിവസം കുവൈത്തിലേക്ക് ഹാഷിഷ് കടത്താന് ശ്രമിച്ച ഇന്ത്യക്കാരനെ വിമാനത്താവളത്തില് പിടികൂടിയിരുന്നു. ഇയാളെ അറസ്റ്റ് ചെയ്തതായി കസ്റ്റംസ് വിഭാഗം ഡയറക്ടര് ജനറല് സുലൈമാന് അല് ഫഹദ് പറഞ്ഞു. ഏകദേശം 49 പാക്കറ്റ് ഹാഷിഷ് ആണ് പിടിച്ചെടുത്തത്. ഇവയ്ക്ക് കാല്ക്കിലോ ഭാരമുണ്ട്. വസ്ത്രങ്ങള്ക്കുള്ളില് ഒളിപ്പിച്ച നിലയിലാണ് ഹാഷിഷ് കടത്താന് ശ്രമിച്ചത്.
നിയമ വിരുദ്ധമായി കുവൈത്തിലേക്ക് കൊണ്ടുവന്ന വിലയേറിയ വാച്ചുകള് കുവൈത്ത് അന്താരാഷ്ട്ര വിമാനത്താവളത്തില് വെച്ച് പിടിച്ചെടുത്തു. വിദേശ രാജ്യത്തു നിന്ന് എത്തിയ ഒരു യാത്രക്കാരന്റെ പക്കല് നിന്നാണ് ഇവ പിടികൂടിയത്. തന്റെ സോക്സിനുള്ളില് ഒളിപ്പിച്ചായിരുന്നു ഇയാള് വാച്ചുകള് കൊണ്ടുവന്നതെന്ന് കുവൈത്ത് കസ്റ്റംസ് സോഷ്യല് മീഡിയയിലൂടെ അറിയിച്ചു. കസ്റ്റംസ് പരിശോധനയില് പിടിക്കപ്പെടാതിരിക്കാനായിരുന്നു ഇയാളുടെ ശ്രമമെന്നും ഇയാള്ക്കെതിരെ തുടര് നടപടികള് സ്വീകരിച്ചതായും അധികൃതര് അറിയിച്ചിട്ടുണ്ട്.
