തിരുവനന്തപുരം: കല്ലമ്പലം നാവായിക്കുളത്ത് ടൂറിസ്റ്റ് ബസ് മറിഞ്ഞ് അപകടം. 17 വിദ്യാർഥികൾക്ക് പരുക്കേറ്റു. ഇതിൽ രണ്ടുപേരുടെ നില ഗുരുതരമാണ്. പരുക്കേറ്റവരെ പാരിപ്പള്ളി മെഡിക്കൽ കോളജിലും കൊല്ലത്തെ സ്വകാര്യ ആശുപത്രിയിലും പ്രവേശിപ്പിച്ചു.
തൃശ്ശൂർ കൊടകര സഹൃദയ കോളജിലെ എംബിഎ വിദ്യാർഥികളാണ് അപകടത്തിൽപ്പെട്ടത്. കോളജിൽ നിന്നും വിഴിഞ്ഞം തുറമുഖത്തേയ്ക്ക് പഠനയാത്ര പോവുകയായിരുന്നു. ഡ്രൈവർ ഉറങ്ങിപ്പോയതാകാം അപകടകാരണമെന്നാണ് പ്രാഥമിക നിഗമനം. 42 വിദ്യാർഥികളും അധ്യാപകരുമായിരുന്നു ബസിൽ ഉണ്ടായിരുന്നത്.
