തിരുവനന്തപുരം: ശ്രീപത്മനാഭസ്വാമി ക്ഷേത്രത്തിൽ എഐ മെറ്റാ കൂളിങ് ഗ്ലാസ് ധരിച്ചെത്തിയ ശ്രീലങ്കൻ വംശജനായ സിംഗപ്പൂർ സ്വദേശിയെ പൊലീസ് പിടികൂടി. ഫേസ്ബുക്കിന്റെ മാതൃകമ്പനിയായ മെറ്റ പുറത്തിറക്കിയ അത്യാധുനിക സാങ്കേതിക വിദ്യകളുള്ള ഗ്ലാസ് ധരിച്ചെത്തിയ തിരുനീപ്പനെയാണ് (49) സുരക്ഷാ ജീവനക്കാർ പിടികൂടിയത്.
ഇന്നലെ രാവിലെ 9.30ന് ആണ് സംഭവം. കുടുംബത്തോടൊപ്പം ദർശനത്തിനെത്തിയതായിരുന്നു. ഫോർട്ട് പൊലീസ് അറസ്റ്റ് ചെയ്ത ശേഷം ഇന്ന് രാവിലെ ഹാജരാകാൻ ആവശ്യപ്പെട്ട് വിട്ടയച്ചു. അതീവ സുരക്ഷയുള്ള ക്ഷേത്രത്തിൽ ഇലക്ട്രോണിക് സാധനങ്ങൾക്കെല്ലാം നിയന്ത്രണമുണ്ട്.
എന്നാൽ ഇക്കാര്യം അറിയാതെയാണ് ഗ്ലാസ് ധരിച്ചെത്തിയതെന്നാണ് ഇദ്ദേഹത്തിന്റെ വിശദീകരണം. തുടർഅന്വേഷണം നടത്തുമെന്ന് പൊലീസ് പറഞ്ഞു.
