അബുദാബി: പ്രതീക്ഷ കൈവിടാതെ കാത്തിരുന്ന അഞ്ചു വർഷങ്ങൾക്കൊടുവിൽ ഭാഗ്യദേവത അജ്മാനിലെ മലയാളി നഴ്സിനെ തേടിയെത്തി. ബിഗ് ടിക്കറ്റിലൂടെയാണ് ടിന്റു ജെസ്മോന് ഒരു ലക്ഷം ദിർഹം (ഏകദേശം 22 ലക്ഷത്തിലേറെ ഇന്ത്യൻ രൂപ) സമ്മാനം ലഭിച്ചത്. ബിഗ് ടിക്കറ്റ് സീരീസ് 281-ലാണ് ടിന്റുവിനെ ഭാഗ്യം തുണച്ചത്.
കഴിഞ്ഞ 15 വർഷമായി യുഎഇയിൽ താമസിക്കുന്ന 40 കാരിയായ ടിന്റു, തന്റെ പത്ത് സുഹൃത്തുക്കൾക്കൊപ്പമാണ് നവംബർ 30-ന് 522882 എന്ന നമ്പറിലുള്ള ടിക്കറ്റ് എടുത്തത്. സുഹൃത്തുക്കളിലൂടെയുമാണ് ടിന്റു ബിഗ് ടിക്കറ്റിനെക്കുറിച്ച് അറിഞ്ഞത്. അഞ്ചു വർഷം മുൻപ് ആദ്യമായി ഭാഗ്യം പരീക്ഷിച്ചു തുടങ്ങി.
പലതവണ നിരാശയായെങ്കിലും പിൻമാറാൻ തയ്യാറാകാതിരുന്ന ടിന്റുവിന് ഒടുവിൽ കഠിനാധ്വാനത്തിന്റെ ഫലമായി ഈ വലിയ സമ്മാനം ലഭിച്ചു. ലഭിച്ച തുക ടിക്കറ്റെടുക്കാൻ കൂടെയുണ്ടായിരുന്ന പത്തു സുഹൃത്തുക്കൾക്കുമായി തുല്യമായി വീതിച്ചു നൽകുമെന്ന് ടിന്റു പറഞ്ഞു. തുടർന്നും ബിഗ് ടിക്കറ്റ് ഭാഗ്യപരീക്ഷണങ്ങളിൽ പങ്കാളിയാകുമെന്നും വരാനിരിക്കുന്ന വലിയ നറുക്കെടുപ്പുകളിലും ഇതേ പ്രതീക്ഷയോടെ കാത്തിരിക്കുമെന്നും കൂട്ടിച്ചേർത്തു.
