കോട്ടയം: നഗരസഭയിൽ 48-ാം വാർഡിൽ (തിരുനക്കര) എൽഡിഎഫിന് വൻ തോൽവി. അപ്രതീക്ഷിത സ്ഥാനാർഥിയായി എത്തിയ എൻസിപി നേതാവ് ലതികാ സുഭാഷാണ് തോറ്റത്. ലതിക ഇവിടെ മൂന്നാം സ്ഥാനത്തേക്ക് പിന്തള്ളപ്പെട്ടു. യുഡിഎഫിലെ സുശീല ഗോപകുമാറാണ് ഇവിടെ വൻ വിജയം നേടിയത്. സുശീലക്ക് 703 വോട്ടുകളും ബിജെപി സ്ഥാനാർഥി നിത്യ രതീഷിന് 279 വോട്ടുകളും ലഭിച്ചപ്പോൾ ലതിക സുഭാഷ് നേടിയത് കേവലം 113 വോട്ടുകളാണ്.
2021ൽ സ്ഥാനാർഥി നിർണയത്തിൽ തഴഞ്ഞതിന്റെ പേരിൽ കോൺഗ്രസ് വിട്ട ലതികാ സുഭാഷ്, പിന്നീട് എൻസിപിയിൽ ചേരുകയായിരുന്നു. തുടർന്നാണ് കോട്ടയം നഗരസഭയിൽ അപ്രതീക്ഷിതമായി സ്ഥാനാർഥിയായി എൽഡിഎഫ് നിയോഗിച്ചത്. എന്നാൽ പരാജയം നേരിടുകയായിരുന്നു.
കോട്ടയം നഗരസഭയിൽ ഒടുവിൽ വിവരം ലഭിക്കുമ്പോൾ 31 സീറ്റുകളിൽ യുഡിഎഫ് വിജയിച്ചു. എൽഡിഎഫിന് 15 സീറ്റുകളിലും എൻഡിഎ 6 സീറ്റുകളിലും വിജയിച്ചിട്ടുണ്ട്. ഇതോടെ കോട്ടയം നഗരസഭയിൽ യുഡിഎഫ് ഭരണം തുടരും.
