മസ്കത്ത്: പ്രവാസികളുടെ റിക്രൂട്ട്മെന്റ് മേഖലയെ നിയന്ത്രിക്കുന്നതിനായി പുതിയ സംവിധാനം പ്രഖ്യാപിച്ച് ഒമാൻ. റിക്രൂട്ട്മെന്റ് ഏജന്സികളുടെ മേൽനോട്ടം വഹിക്കുക, ധാർമ്മിക മാനദണ്ഡങ്ങൾ നടപ്പിലാക്കുക, തൊഴിൽ തർക്കങ്ങൾ പരിഹരിക്കുക, നിയന്ത്രിത മാർഗങ്ങളിലൂടെ യോഗ്യതയുള്ള പ്രവാസി തൊഴിലാളികളെ കൊണ്ടുവരാനുള്ള ശ്രമങ്ങളെ പിന്തുണയ്ക്കുക എന്നിവയാണ് സംവിധാനം ലക്ഷ്യമിടുന്നത്. ഇത് സംബന്ധിച്ച് സാമൂഹിക വികസന മന്ത്രാലയം ഉത്തരവിറക്കി.
‘അസോസിയേഷൻ ഓഫ് എക്സ്പാട്രിയേറ്റ് വർക്കർ റിക്രൂട്ട്മെന്റ് ഓഫിസ്’ എന്ന പേരിൽ പുതിയ സംവിധാനം പ്രവർത്തിക്കും. ഒമാനിലും പുറത്തുമുള്ള സർക്കാർ സ്ഥാപനങ്ങൾ, കമ്പനികൾ, സ്ഥാപനങ്ങൾ എന്നിവയുമായി ഏകോപിപ്പിച്ച് റിക്രൂട്ട്മെന്റ് രീതികൾ നിയന്ത്രിക്കുകയും മാനദണ്ഡമാക്കുകയും ചെയ്യും. രാജ്യത്തിന്റെയും ദേശീയ നിയമനിർമാണത്തിന്റെയും അടിസ്ഥാന നിയമത്തിന് അനുസൃതമായി റിക്രൂട്ട്മെന്റിന്റെ തത്വങ്ങൾ സംരക്ഷിക്കും.
അഫിലിയേറ്റഡ് റിക്രൂട്ട്മെന്റ് ഓഫിസുകൾ ഫലപ്രദമായും നിയമപരമായും പ്രവർത്തിക്കുന്നുണ്ടെന്ന് ഉറപ്പാക്കുന്നതിനും അവരുടെ അവകാശങ്ങളും താൽപര്യങ്ങളും സംരക്ഷിക്കുന്നതിനും അസോസിയേഷൻ ശ്രദ്ധ കേന്ദ്രീകരിക്കും. തൊഴിലാളികൾ ഉൾപ്പെടുന്ന തർക്കങ്ങൾ പരിഹരിക്കുന്നതുമായി ബന്ധപ്പെട്ട കാര്യങ്ങളിൽ വിദേശകാര്യ മന്ത്രാലയം വഴി എംബസികളുമായി ഏകോപിപ്പിക്കുന്നതും ‘അസോസിയേഷൻ ഓഫ് എക്സ്പാട്രിയേറ്റ് വർക്കർ റിക്രൂട്ട്മെന്റ് ഓഫിസ്’ വഴിയാകും.
ലൈസൻസില്ലാത്ത റിക്രൂട്ട്മെന്റ് ഓഫിസുകൾ ഇല്ലാതാക്കുന്നതിനും സർക്കാർ ഏജൻസികളുമായും സ്പെഷലിസ്റ്റുകളുമായും സഹകരിച്ച് തൊഴിൽ വിപണി നിയന്ത്രിക്കുന്നതിനും ബന്ധപ്പെട്ട വിഭാഗങ്ങളുമായി ചേർന്ന് പ്രവർത്തിക്കും. രണ്ട് വർഷത്തെ കാലാവധിയുള്ള 12 അംഗങ്ങൾ അടങ്ങുന്ന ഒരു ഡയറക്ടർ ബോർഡാണ് അസോസിയേഷൻ നിയന്ത്രിക്കുന്നത്.
