സ്വർണവില കേരളത്തിന്റെ ചരിത്രത്തിൽ ആദ്യമായി പവന് 80,000ന് മുകളിൽ; ഗ്രാം വില 10,000 രൂപയെന്ന നാഴികക്കല്ലും ഭേദിച്ചു. ഇന്ന് ഒറ്റദിവസം 1,000 രൂപയുടെ കുതിപ്പുമായി പവൻവില 80,880 രൂപയിലെത്തി. ഗ്രാമിന് 125 രൂപ ഉയർന്ന് 10,110 രൂപയും.
81,000 രൂപയെന്ന അടുത്ത നാഴികക്കല്ലിലേക്ക് പവൻ ഇനി 120 രൂപ മാത്രം അകലെ. ഇന്നൊരൊറ്റ പവന്റെ ആഭരണം വാങ്ങാൻപോലും മിനിമം കൊടുക്കേണ്ടത് 87,530 രൂപ. 3% ജിഎസ്ടിയും 53.10 രൂപ ഹോൾമാർക്ക് ചാർജും കുറഞ്ഞത് 5% പണിക്കൂലിയും ചേർത്തുള്ള വാങ്ങൽത്തുകയാണിത്.
ഒറ്റ ഗ്രാം സ്വർണാഭരണത്തിന് ഇതുപ്രകാരം മിനിമം 11,000 രൂപയ്ക്കടുത്തും നൽകണം. കഴിഞ്ഞ മൂന്നാഴ്ചയ്ക്കിടെ മാത്രം കേരളത്തിൽ ഗ്രാമിന് 895 രൂപയും ഗ്രാമിന് 7,160 രൂപയും കൂടി. ആഭരണപ്രിയരെയും വിവാഹം ഉൾപ്പെടെ ആവശ്യങ്ങൾക്കായി സ്വർണാഭരണങ്ങൾ വാങ്ങാൻ ശ്രമിക്കുന്നവരെയുമാണ് ഈ വിലക്കുതിപ്പ് നിരാശരാക്കുന്നത്.
വിലക്കുതിപ്പിന്റെ പൊന്നുംവഴികൾ
സ്വർണവിലയിലുണ്ടായ വർധനയുടെ ചരിത്രം ഇങ്ങനെ: ഒരു പവന്റെ വില (രൂപയിൽ)
∙ 1925 : 13.75
∙ 1940 : 26.77
∙ 1950 : 72.75
∙ 1970 : 135.30
∙ 1980 : 975
∙ 1995 : 3,432
∙ 2000 : 3,212
∙ 2010 : 12,280
∙ 2015 : 19,760
∙ 2020 : 32,000
∙ 2023 : 44,000
∙ 2024 : 50,200
∙ 2025 : 80,880
