കോഴിക്കോട്: ധര്‍മസ്ഥല വ്യാജ വെളിപ്പെടുത്തല്‍ കേസില്‍ പൊലീസ് സുരക്ഷ ആവശ്യപ്പെട്ട് യൂട്യൂബര്‍ മനാഫ്. തന്റെ ജീവന് ഭീഷണിയുണ്ടെന്നും പൊലീസ് സംരക്ഷണം വേണമെന്നുമാണ് മനാഫ് ആവശ്യപ്പെട്ടിരിക്കുന്നത്. സംരക്ഷണം ആവശ്യപ്പെട്ട് കോഴിക്കോട് പൊലീസ് കമ്മീഷണറെ കണ്ടതായും മനാഫ് പറഞ്ഞു.
കേസില്‍ പ്രത്യേക അന്വേഷണ സംഘത്തിനു (എസ്‌ഐടി) മുന്നില്‍ ഹാജരാകാന്‍ മനാഫിന് നിര്‍ദേശം ലഭിച്ചിരുന്നു. തിങ്കളാഴ്ച പൊലീസ് സംരക്ഷണത്തില്‍ എസ്‌ഐടിക്ക് മുന്നില്‍ ഹാജരാകും. സംരക്ഷണം നല്‍കുമെന്ന് കമ്മീഷണര്‍ അറിയിച്ചു.
ധര്‍മസ്ഥലയില്‍ നിരവധി സ്ത്രീകളെ മറവ് ചെയ്‌തെന്ന് മുന്‍ ശുചീകരണ തൊഴിലാളി ആരോപിച്ചതിനു പിന്നാലെയാണ് മനാഫ് തന്റെ യൂട്യൂബ് ചാനലിലൂടെ ചില പരാമര്‍ശങ്ങള്‍ നടത്തിയത്. ബലാത്സംഗം ചെയ്ത് കൊലപ്പെടുത്തി പലരേയും കുഴിച്ചിട്ടുണ്ടെന്നും കേരള സാരി ഉടുത്ത സ്ത്രീകളും ഉള്‍പ്പെടുമെന്നുമൊക്കെയായിരുന്നു മനാഫ് പറഞ്ഞത്.
