കോഴിക്കോട്: ഉരുള്പൊട്ടല് ദുരന്തത്തില് രക്ഷാപ്രവര്ത്തനത്തിലുള്പ്പെടെ പങ്കാളികളായവര്ക്ക് സൗജന്യ ഭക്ഷണം വിളമ്പാനായി നാദാപുരം നരിപ്പറ്റയില് മുസ്ലിം യൂത്ത് ലീഗ് വൈറ്റ്ഗാര്ഡ് നടത്തിവന്ന ഊട്ടുപുര പൂട്ടിച്ച് സര്ക്കാര്. ഡി.ഐ.ജി തോംസണ് ജോസിന്റെ നിര്ദേശപ്രകാരമാണ് ഊട്ടുപുരയുടെ സേവനം അവസാനിപ്പിക്കേണ്ടിവന്നതെന്ന് വൈറ്റ്ഗാര്ഡ് അറിയിച്ചു. സര്ക്കാര് തീരുമാനമാണെന്നാണ് ഡി.ഐ.ജി അറിയിച്ചതെന്നും സംഘാടകര് പറഞ്ഞു.
ദുരന്തമുഖത്ത് രക്ഷാപ്രവര്ത്തനം നടത്തുന്ന സന്നദ്ധപ്രവര്ത്തകര്, സൈനികര്, പൊലീസുകാര്, വളണ്ടിയര്മാര്, ആരോഗ്യപ്രവര്ത്തകര്, മൃതദേഹം തിരയുന്ന ബന്ധുക്കള്, മാധ്യമപ്രവര്ത്തകര് തുടങ്ങിയ എല്ലാവര്ക്കും നാലു ദിവസം ഭക്ഷണം പാചകം ചെയ്ത് വിതരണം ചെയ്തിരുന്ന ഊട്ടുപുരയാണ് സര്ക്കാര് നിര്ദേശത്തെ തുടര്ന്ന് പൂട്ടേണ്ടിവന്നത്. ഇക്കാര്യം ചൂണ്ടിക്കാട്ടി സംഘാടകര് ഊട്ടുപുരയ്ക്ക് മുന്നില് ഫ്ളക്സ് കെട്ടിയിട്ടുണ്ട്.
‘പ്രിയ വയനാട് നിവാസികളെ, കഴിഞ്ഞ നാല് നാള് നിങ്ങളുടെ ദുഃഖത്തില് പങ്കുചേരാനും നിങ്ങള്ക്കുവേണ്ടി കഠിനാധ്വാനം ചെയ്യുന്ന നാനാവിഭാഗം സന്നദ്ധപ്രവര്ത്തകര്ക്ക് ആഹാരം നല്കാനും കഴിഞ്ഞതില് ഞങ്ങള് സന്തുഷ്ടരാണ്. രക്ഷാദൗത്യം കഴിയുന്നതുവരെ സേവനം തുടരാനായിരുന്നു ഞങ്ങളുടെ നിയ്യത്ത്. ദൗര്ഭാഗ്യവശാല് ഈ സേവനം അവസാനിപ്പിക്കാനും ഇനി ഞങ്ങളുടെ ഭക്ഷണവിതരണത്തിന്റെ ആവശ്യമില്ല എന്നും ബഹുമാനപ്പെട്ട ഡി.ഐ.ജി തോംസണ് ജോസ് അറിയിച്ചതുപ്രകാരം ഞങ്ങള് ഈ സേവനം അവസാനിപ്പിക്കുകയാണ്’- വൈറ്റ്ഗാര്ഡ് പറയുന്നു.
സര്ക്കാര് നീക്കത്തിനെതിരെ രൂക്ഷവിമര്ശനവുമായി യൂത്ത് ലീഗ് സംസ്ഥാന ജനറല് സെക്രട്ടറി പി.കെ ഫിറോസ് രംഗത്തെത്തി.
‘ഊട്ടുപുരയുണ്ടായിരുന്നതിനാല് ദുരന്തബാധിത പ്രദേശത്തും പരിസരത്തുമുള്ള ഒരാള് പോലും ഭക്ഷണം കിട്ടാതെ പ്രയാസപ്പെട്ടിരുന്നില്ല. ഒട്ടേറെ പേര്ക്ക് സൗജന്യമായി നല്കിയ ഭക്ഷണ വിതരണം നിര്ത്തിച്ചത് പച്ചമലയാളത്തില് പറഞ്ഞാല് ശുദ്ധ തെമ്മാടിത്തമാണ്. നാല് ദിവസം വിശ്രമമില്ലാതെ സേവനം ചെയ്തവരെ ആക്ഷേപിച്ചത് പൊറുക്കാനാവാത്ത തെറ്റാണ്. ഇതിന് സര്ക്കാര് മറുപടി പറഞ്ഞേ തീരൂ’- എന്നും അദ്ദേഹം സോഷ്യല് മീഡിയയില് കുറിച്ചു.
അതേസമയം, ഭക്ഷണം ഉണ്ടാക്കി വിതരണം ചെയ്യാന് സര്ക്കാര് നേരിട്ട് സൗകര്യമുണ്ടാക്കിയിട്ടുണ്ടെന്നും ഫുഡ് സേഫ്റ്റി ഓഫിസര് കൃത്യമായ പരിശോധന നടത്തിയാണ് അവിടെ ഭക്ഷണം കൊടുക്കുന്നതെന്നുമാണ് സര്ക്കാറിന്റെ ഭഗത്തു നിന്നുള്ള ന്യായീകരണം. ‘പട്ടാളക്കാര് ഉള്പ്പെടെയാണ് രക്ഷാപ്രവര്ത്തനത്തിലുള്ളത്. എന്തെങ്കിലും പ്രയാസം വന്നാല് അത് ബുദ്ധിമുട്ടാണ്. അതുകൊണ്ടാണ് അവിടുത്തെ പോളിടെക്നിക്കില് സര്ക്കാര് ഭക്ഷണമുണ്ടാക്കി വിതരണം ചെയ്യാന് തീരുമാനിച്ചത്- മന്ത്രി മുഹമ്മദ് റിയാസ് വ്യക്തമാക്കി.
