തിരുവനന്തപുരം: എൻ.ഡി.എ സ്ഥാനാർഥി രാജീവ് ചന്ദ്രശേഖറിന്റെ നാമനിർദേശ പത്രികക്കൊപ്പം സമർപ്പിച്ച സത്യവാങ്മൂലത്തിലെ ആസ്തിവിവരങ്ങൾ അപൂർണമെന്ന് പരാതി. ഇക്കാര്യമുന്നയിച്ച് സുപ്രീംകോടതി അഭിഭാഷക ആവണി ബൻസാൽ തിരുവനന്തപുരം ജില്ല കലക്ടർക്ക് പരാതി നൽകി. അതേസമയം സൂക്ഷ്മപരിശോധന നടപടികൾ പൂർത്തിയാക്കി രാജീവ് ചന്ദ്രശേഖറിന്റെ പത്രിക വരണാധികാരി സ്വീകരിച്ചു.
2021-22 സാമ്പത്തിക വർഷം ആദായനികുതി റിട്ടേൺ സമർപ്പിച്ചത് 680 രൂപക്കാണെന്നാണ് സത്യവാങ്മൂലത്തിലുള്ളതെന്നാണ് പരാതിയിലെ ആരോപണം. 2022-23 ൽ 5,59,200 രൂപക്കും. പ്രഫഷൻ സൂചിപ്പിച്ചിരിക്കുന്നത് സാമൂഹിക സേവനമെന്നാണ്. വാഹനങ്ങളുടെ പൂർണ വിവരങ്ങളും നൽകിയിട്ടില്ല.
ഓഹരി നിക്ഷേപവും മ്യൂച്വൽ ഫണ്ട് വിവരങ്ങളും പൂർണമായി നൽകിയില്ല. കമ്പനികളുടെയും ഓഹരികളുടെയും വിശദാംശങ്ങൾ നൽകിയില്ലെന്നും പരാതിയിലുണ്ട്. അതേസമയം രാഷ്ട്രീയ പരാതിയെന്ന നിലയിലാണ് ബി.ജെ.പി കേന്ദ്രങ്ങൾ ഇതിനെ വിശേഷിപ്പിക്കുന്നത്.
