അബുദാബി: നിയമലംഘനം നടത്തിയ തീയതി മുതൽ ആദ്യത്തെ 60 ദിവസത്തിനുള്ളിൽ അടയ്ക്കുകയാണെങ്കിൽ ട്രാഫിക് പിഴയിൽ 35 ശതമാനം ഇളവും 60 ദിവസത്തിന് ശേഷം ഒരു വർഷത്തെ കാലാവധിക്കുള്ളില് അടയ്ക്കുമ്പോൾ 25 ശതമാനം ഇളവും ലഭിക്കുമെന്ന് അബുദാബി ട്രാഫിക്.
കൂടാതെ, ബ്ലാക്ക് പോയിന്റ് ഒഴിവാക്കുമെന്നും പൊലീസ് പ്രഖ്യാപിച്ചു.
എന്നാൽ, ഗുരുതരമായ ലംഘനങ്ങൾ ഈ ഉദ്യമത്തിൽ നിന്ന് ഒഴിവാക്കിയിട്ടുണ്ട്. 12 മാസത്തേയ്ക്ക് പൂജ്യം പലിശ നിരക്കിൽ അബുദാബി പൊലീസിൽ റജിസ്റ്റർ ചെയ്തിട്ടുള്ള ബാങ്കുകൾ വഴി തവണകളായി പിഴ അടയ്ക്കാമെന്നും അറിയിച്ചു.
∙ ഇളവുകൾ എങ്ങനെ ലഭിക്കും?
അബുദാബി ഗവൺമെന്റിന്റെ ഡിജിറ്റൽ ചാനലുകൾ “Tamm”, പൊലീസിന്റെ ഉപയോക്തൃ സേവനത്തിലൂടെയും സന്തോഷ പ്ലാറ്റ്ഫോമുകളിലൂടെയും നേരിട്ടുള്ള പണമടയ്ക്കൽ, യുഎഇയിലെ അഞ്ച് ബാങ്കുകളുമായി സഹകരിച്ച് ബാങ്കുകളുടെ മൊബൈൽ ആപ്ലിക്കേഷനുകൾ എന്നിവയുൾപ്പെടെ ട്രാഫിക് ലംഘനങ്ങൾ അടയ്ക്കുന്നതിന് ഒട്ടേറെ വഴികളുണ്ട്.
അബുദാബി കൊമേഴ്സ്യൽ ബാങ്ക് (എഡിസിബി), അബുദാബി ഇസ്ലാമിക് ബാങ്ക് (എഡിഐബി), ഫസ്റ്റ് അബുദാബി ബാങ്ക് (എഫ്എബി), മഷ്ര്രിഖ് അൽ ഇസ് ലാമി, എമിറേറ്റ്സ് ഇസ്ലാമിക് ബാങ്ക് എന്നിവ ഇതിൽ ഉൾപ്പെടുന്നു. ബാങ്ക് സേവനം ലഭിക്കാൻ, ഡ്രൈവർമാർക്ക് ഈ ബാങ്കുകളിലൊന്ന് നൽകുന്ന ക്രെഡിറ്റ് കാർഡുകൾ ഉണ്ടായിരിക്കണം. ട്രാഫിക് പിഴ അടയ്ക്കുന്നതിന് തവണകളായി വാഹനമോടിക്കുന്നവർ ബുക്ക് ചെയ്ത തീയതി മുതൽ രണ്ടാഴ്ചയിൽ കൂടാത്ത കാലയളവിനുള്ളിൽ ബാങ്കുമായി നേരിട്ട് ബന്ധപ്പെടണം.
∙ തവണകളായി പിഴ അടയ്ക്കാം
ട്രാഫിക് ലംഘനത്തിനുള്ള പിഴകൾ ഒരു വർഷം മുഴുവനും തവണകളായി അടയ്ക്കാനും അവസരമുണ്ട്. ഡ്രൈവർമാർക്കും വാഹന ഉടമകൾക്കും ജീവിതം സുഗമമാക്കാനാണ് ഈ സേവനം ലക്ഷ്യമിടുന്നതെന്ന് പൊലീസ് പറഞ്ഞു. ബ്ലാക്ക് പോയിന്റ് കുറയ്ക്കൽ, ഡ്രൈവിങ് ലൈസൻസിൽ നെഗറ്റീവ്(ബ്ലാക്ക്) ട്രാഫിക് പോയിന്റുകൾ ഉണ്ടെങ്കിൽ, ചിലത് ഒഴിവാക്കാനുള്ള അവസരവുമുണ്ട്.
രണ്ട് മാസത്തെ വേനൽക്കാല അവധിക്ക് ശേഷം തിങ്കളാഴ്ച ആയിരക്കണക്കിന് വിദ്യാർത്ഥികൾ സ്കൂളിലേക്ക് മടങ്ങുമ്പോൾ സുരക്ഷിതമായി വാഹനമോടിക്കുന്നവർക്ക് അവരുടെ റെക്കോർഡിൽ നിന്ന് നാല് ട്രാഫിക് പോയിന്റുകൾ ലഭിക്കുമെന്ന് യുഎഇ ആഭ്യന്തര മന്ത്രാലയം അറിയിച്ചു.
