മിയാമി: ഇന്റര് മിയാമിയുമായി കരാര് ഒപ്പുവെച്ച് ലയണല് മെസ്സി. 2025 വരെയാണ് മെസ്സിയുടെ കരാറെന്ന് ക്ലബ്ബ് അറിയിച്ചു. പത്താം നമ്പര് ജഴ്സിയണിഞ്ഞ് നില്ക്കുന്ന മെസ്സിയുടെ ചിത്രങ്ങള് ഇന്റര് മിയാമി പങ്കുവെക്കുകയും ചെയ്തു. മെക്സിക്കന് ക്ലബ്ബായ ക്രുസ് അസുലുമായി ഈ മാസം 21നാണ് മെസ്സിയുടെ ഇന്റര് മിയാമിയിലെ അരങ്ങേറ്റ മത്സരം.
ആദ്യമായാണ് യൂറോപ്പിന് പുറത്തുള്ള ക്ലബ്ബിന് വേണ്ടി മെസ്സി ബൂട്ടണിയുന്നത്. ‘ഇന്റര് മിയാമിയിലും അമേരിക്കയിലും എന്റെ കരിയറിന്റെ അടുത്ത ഘട്ടം ആരംഭിക്കുന്നതില് ഞാന് വളരെ ആവേശത്തിലാണ്’, മെസ്സി പ്രതികരിച്ചു.
മെസ്സിയുമായുള്ള സൈനിംഗ് സ്വപ്ന സാക്ഷാത്കാരമാണെന്നാണ് മുന് ഇംഗ്ലണ്ട് താരവും ഇന്റര് മിയാമിയുടെ സഹ ഉടമസ്ഥനുമായ ഡേവിഡ് ബെക്കാം വിശേഷിപ്പിച്ചത്.
ഇന്റര് മിയാമിയുടെ ഹോം ഗ്രൗണ്ടായ ഡിആര്വി പിഎന്കെ സ്റ്റേഡിയത്തില് ആരാധകരുടെ മുന്നില് ഉടന് മെസ്സിയെ അവതരിപ്പിക്കുമെന്നാണ് റിപ്പോര്ട്ടുകള്. ക്ലബ്ബിന്റെ ഉടമകളിലൊരാളായ ഡേവിഡ് ബെക്കാമും ചടങ്ങിനെത്തിയേക്കും.
ചൊവ്വാഴ്ചയാണ് മെസ്സി കുടുംബസമേതം ഫ്ളോറിഡയിലെത്തിയത്. സൂപ്പര് താരത്തെ വരവേല്ക്കുന്നതിന് ഫ്ളോറിഡയിലെങ്ങും കട്ടൗട്ടുകള് ഉയര്ന്നിരുന്നു.
2022-23 സീസണിന്റെ അവസാനത്തിലാണ് മെസ്സി ഫ്രഞ്ച് ക്ലബ്ബായ സെന്റ് പാരിസ് ജര്മന് വിടുന്നത്. തുടര്ന്ന് അമേരിക്കന് ക്ലബ്ബായ ഇന്റര് മിയാമിയിലേക്ക് ചേക്കേറാന് തീരുമാനിക്കുകയായിരുന്നു. മെസ്സിയുടെ മുന് ക്ലബ്ബായ ബാഴ്സലോണയിലെ സഹതാരം സെര്ജിയോ ബുസ്ക്വെറ്റ്സും മിയാമിയുമായി ധാരണയിലെത്തിയിട്ടുണ്ട്. ബാഴ്സലോണയിലും അര്ജന്റീന ദേശീയ ടീമിലും മെസ്സിയെ പരിശീലിപ്പിച്ചിട്ടുള്ള ജെറാഡ് മാര്ട്ടിനോയാണ് ഇന്റര് മിയാമിയുടെ പരിശീലകന്.
