ജിദ്ദ: മധ്യപ്രദേശിലെ ഇൻഡോറിൽ വെച്ച് നടക്കുന്ന 17- മത് പ്രവാസി ഭാരതീയ ദിവസിൽ വെച്ച് കേന്ദ്ര വിദേശ കാര്യ സഹ മന്ത്രി വി. മുരളീധരന് ഒ ഐ സി സി സഊദി വെസ്റ്റേൺ റീജ്യണൽ കമ്മറ്റി പ്രസിഡന്റ് കെ. ടി. എ മുനീർ പ്രവാസികളുടെ വിവിധ വിഷയങ്ങൾ ഉന്നയിച്ചുകൊണ്ട് നിവേദനം നൽകി.
പൊതുമേഖലാ യൂണിറ്റുകൾ പി. പി. പി മാതൃകയിൽ പ്രൊഫഷണൽ രീതിയിൽ പ്രവർത്തിക്കാൻ പ്രവാസികൾക്ക് പാട്ടത്തിന് നൽകുക, സംസ്ഥാന – കേന്ദ്ര സർക്കാരുകൾ ഏറ്റെടുക്കുന്ന ബി. ഒ. ടി പദ്ധതികളിൽ പ്രവാസികൾക്ക് സംയുക്ത സംരംഭത്തിനുള്ള അവസരങ്ങൾ അനുവദിക്കുക, സംസ്ഥാന വ്യാവസായിക വികസന കോർപ്പറേഷന്റെ സഹായത്തോടെയും വൈദഗ്ധ്യത്തോടെയും ഒരു പ്രവാസി സഹകരണ സംഘം മുഖേന ഓരോ പഞ്ചായത്തിലും (തദ്ദേശ സ്ഥാപനം) ഒരു മഴവെള്ള സംഭരണ യൂണിറ്റും ഒരു മാലിന്യ നിർമാർജന – പുനരുപയോഗ യൂണിറ്റും സ്ഥാപിക്കുക, വിദേശത്ത് കൂടുതൽ അവസരങ്ങൾ സൃഷ്ടിക്കുന്നതിന് യുവാക്കൾക്ക് ഉയർന്ന വൈദഗ്ധ്യമുള്ള പരിശീലന കേന്ദ്രം സ്ഥാപിക്കുക, ദേശസാൽകൃത ബാങ്കുകളുടെ സെലക്ടീവ് ശാഖകൾ ഇസ്ലാമിക് ബാങ്കിങ്ങിന് മാത്രമായി സമർപ്പിക്കുകയും പലിശ ബന്ധിത നിക്ഷേപ പദ്ധതികളിൽ താൽപ്പര്യമില്ലാത്ത പ്രവാസികളുടെ വിഭാഗത്തെ ആകർഷിക്കാൻ ആകർഷകമായ ഡിവിഡന്റ് സ്കീമുകൾ ആവിഷ്കരിക്കുക, മികച്ച അവസരങ്ങൾക്കായി പ്രവാസി ഓറിയന്റേഷൻ പ്രോഗ്രാമുകൾ നൽകുന്നതിന് എല്ലാ ജില്ലയിലും ഒരു പ്രവാസി ജോബ് സെൽ സൃഷ്ടിക്കുക, മടങ്ങിവരുന്ന പ്രവാസികൾക്കും അവരുടെ ആശ്രിതർക്കും സർക്കാർ ജോലികളിൽ 10 ശതമാനം സംവരണം നൽകുക, പ്രവാസി നിയമ പ്രശ്നങ്ങളിൽ ഇടപെടുന്നതിന് അതിവേഗ നിയമ സെൽ യൂണിറ്റുകൾ രൂപകല്പന ചെയ്യുക, വിദേശത്തുള്ള നിർദ്ധനരായ പ്രവാസികളെ സഹായിക്കാൻ അതത് രാജ്യങ്ങളിൽ നിന്നുള്ള അഭിഭാഷകരുമായി നിയമസഹായ സെൽ സ്ഥാപിക്കുക, വിമാനക്കമ്പനികളുടെ നിരക്ക് കുറയ്ക്കുന്നതിനും ലേബർ നിരക്ക് നടപ്പിലാക്കുന്നതിനുമായി ഒരു പുതിയ റെഗുലേറ്ററി അതോറിറ്റി രൂപീകരിക്കുക തുടങ്ങിയ കാര്യങ്ങളാണ് നിവേദനത്തിലൂടെ ആവശ്യപ്പെട്ടത് . ജിദ്ദയിലെ പ്രവാസി സംരഭകൻ അബ്ദുറഹിമാൻ ഫായിദയും സന്നിഹിതനായിരുന്നു.
