റിയാദ്: തദ്ദേശീയമായി നിർമ്മിച്ച ആദ്യത്തെ തീവ്രപരിചരണ വെന്റിലേറ്റർ സൗദി അറേബ്യ പുറത്തിറക്കി. നിക്ഷേപ മന്ത്രി എൻജിനീയറുടെ സാന്നിധ്യത്തിലായിരുന്നു ലോഞ്ചിംഗ് ചടങ്ങ്. ഖാലിദ് അൽ ഫാലിഹും ആസൂത്രണ വികസന ആരോഗ്യ ഡെപ്യൂട്ടി മന്ത്രി എഞ്ചി. അബ്ദുൽ അസീസ് അൽ റുമൈഹും ചടങ്ങിൽ പങ്കെടുത്തു.
പ്രമുഖ ആഗോള ഹെൽത്ത് ടെക്നോളജി കമ്പനിയായ മെഡ്ട്രോണിക് സഊദി അറേബ്യയുടെയും അൽ-റൗദ് ടെക്നിക്കൽ സിസ്റ്റംസ് കമ്പനിയുടെയും പങ്കാളിത്തത്തിലൂടെയാണ് പുതിയ ഉൽപ്പന്നം വികസിപ്പിച്ചത്.
നിക്ഷേപ മന്ത്രാലയം, വ്യവസായ, ധാതു വിഭവ മന്ത്രാലയം, പ്രാദേശിക ഉള്ളടക്കം, സർക്കാർ സംഭരണ അതോറിറ്റി എന്നിവയിൽ നിന്നുള്ള പിന്തുണയും പങ്കാളിത്തവും സ്ഥാപനങ്ങൾക്ക് ഉണ്ടായിരുന്നു.
രണ്ട് കമ്പനികളും തമ്മിലുള്ള പങ്കാളിത്തം പ്രതിവർഷം 1,200 തീവ്രപരിചരണ വെന്റിലേറ്ററുകൾ നിർമ്മിക്കുന്നതിന് സംഭാവന ചെയ്യും. ആദ്യ രണ്ട് വർഷത്തിനുള്ളിൽ ശരാശരി 46 ശതമാനം ജീവനക്കാരുടെ സഊദിവൽക്കരണം ഇതിലൂടെ ലക്ഷ്യമിടുന്നുണ്ട്.
കൂടുതൽ തൊഴിലവസരങ്ങൾ സൃഷ്ടിച്ചുകൊണ്ട് ഭാവിയിൽ സഊദിവൽക്കരണത്തിന്റെ ശതമാനം വർദ്ധിപ്പിക്കും.
സഊദികൾക്ക് സ്വകാര്യമേഖലയിൽ നിരവധി തൊഴിലവസരങ്ങൾ സൃഷ്ടിക്കുന്നതിനൊപ്പം, സാങ്കേതിക പുരോഗതി കൈമാറ്റം ചെയ്യാനും രാജ്യത്തുതന്നെ മെഡിക്കൽ ഉപകരണങ്ങളുടെ നിർമ്മാണം പ്രാപ്തമാക്കുന്നതിന് പ്രാദേശിക ആരോഗ്യ സംവിധാനത്തെ പിന്തുണയ്ക്കാനും ഈ പങ്കാളിത്തം ലക്ഷ്യമിടുന്നു.
തീവ്രപരിചരണ വിഭാഗങ്ങളിലും ക്രിട്ടിക്കൽ കെയർ യൂണിറ്റുകളിലും ഉപയോഗിക്കുന്നതിനായി നൂതന തലമുറ വെന്റിലേറ്ററുകളുടെ പ്രാദേശിക നിർമ്മാണത്തിനായി പ്രവർത്തിക്കാനും ഈ പങ്കാളിത്തം ലക്ഷ്യമിടുന്നു.
ഈ ഉപകരണം അതിന്റെ സുരക്ഷിതവും മികച്ചതുമായ രൂപകൽപ്പനയിലൂടെ സാധാരണഗതിയിൽ ശ്വസിക്കാൻ രോഗികളെ സഹായിക്കുന്നു. കൂടാതെ ഉയർന്ന അളവിലുള്ള സുരക്ഷയ്ക്ക് പുറമേ തീവ്രപരിചരണ വിഭാഗത്തിലെ രോഗികൾക്ക് പിന്തുണയും ആശ്വാസവും നൽകുന്നുണ്ട്.
