റിയാദ്: ഖത്തറിന് അധിക പിന്തുണയോ സൗകര്യങ്ങളോ നൽകാൻ എല്ലാ സഊദി മന്ത്രാലയങ്ങളോടും അധികാരികളോടും സർക്കാർ ഏജൻസികളോടും കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ നിർദ്ദേശിച്ചു.
കായിക മന്ത്രി അബ്ദുൽ അസീസ് ബിൻ തുർക്കി അൽ ഫൈസൽ രാജകുമാരനാണ് ഇക്കാര്യം അറിയിച്ചത്. ഇത് സംബന്ധിച്ച് തുടർനടപടികൾ സ്വീകരിക്കാനും ഇത് സംബന്ധിച്ച പ്രഥമവിവര റിപ്പോർട്ട് തനിക്ക് സമർപ്പിക്കാനും കിരീടാവകാശി കായിക മന്ത്രിയോട് നിർദ്ദേശിച്ചതായി അദ്ദേഹം പറഞ്ഞു.
ലോകകപ്പ് ആരാധകർക്ക് സഊദി അറേബ്യ കടന്ന് ഖത്തറിലേക്കുള്ള യാത്ര സുഗമമാക്കുന്നതിനുള്ള എല്ലാ ക്രമീകരണങ്ങളും സൗകര്യങ്ങളും സഊദി അധികൃതർ ഒരുക്കിയിട്ടുണ്ട്. 2022 ലെ ഖത്തർ ലോകകപ്പിൽ സഊദി അറേബ്യയിൽ നിന്ന് 500 ലധികം വോളന്റിയർമാർ പങ്കെടുക്കുമെന്ന് കായിക മന്ത്രാലയം നേരത്തെ പ്രഖ്യാപിച്ചിരുന്നു. 5,000 ഗ്രീൻ ഫാൽക്കൺസ് ആരാധകരെ ഉൾപ്പെടുത്തുമെന്ന് സഊദി അറേബ്യൻ ഫുട്ബോൾ ഫെഡറേഷൻ സെക്രട്ടറി ജനറൽ ഇബ്രാഹിം അൽ ഖാസിം വെളിപ്പെടുത്തി.
ലോകകപ്പ് സീസണിൽ 60 ദിവസം വരെ സഊദി ചെലവഴിക്കാൻ ഹയ്യ കാർഡ് കൈവശമുള്ള എല്ലാ ഫിഫ ലോകകപ്പ് ഖത്തർ 2022 ആരാധകരെയും സഊദി അറേബ്യ സ്വാഗതം ചെയ്യുമെന്ന് വിദേശകാര്യ മന്ത്രാലയം അറിയിച്ചു.
സൗദിയിലെ കര വിമാനത്താവളങ്ങളും ഒരുക്കങ്ങൾ പൂർത്തിയാക്കിയിട്ടുണ്ട്. കിംഗ് ഖാലിദ് ഇന്റർനാഷണൽ എയർപോർട്ട്, കിംഗ് അബ്ദുൽ അസീസ് ഇന്റർനാഷണൽ എയർപോർട്ട്, കിംഗ് ഫഹദ് ഇന്റർനാഷണൽ എയർപോർട്ട്, പ്രിൻസ് നൈഫ് ഇന്റർനാഷണൽ എയർപോർട്ട്, പ്രിൻസ് മുഹമ്മദ് ബിൻ അബ്ദുൽ അസീസ് ഇന്റർനാഷണൽ എയർപോർട്ട് എന്നിങ്ങനെ അഞ്ച് എയർപോർട്ടുകളാണ് ലോകകപ്പ് വിമാനങ്ങൾ സർവീസ് നടത്തുന്നത്.
