ജിദ്ദ: പ്രവാസി ഇന്ത്യന് വിദ്യാര്ഥികള്ക്ക് സമഗ്ര മികവിന്റെ ജീവിത പാഠങ്ങള് പകര്ന്നു നല്കിയും വിജയത്തിലേക്കുള്ള താക്കോലുകള് സമ്മാനിച്ചും ടാലെന്റ് ലാബ് സീസണ് -2 ഏകദിന ശില്പശാലക്ക് പരിസമാപ്തി. അഞ്ച് സെഷനുകളിലായി പത്ത് മണിക്കൂറോളം നീണ്ട ശില്പശാലയില് ഇന്ത്യന് കോണ്സല് ജനറല് മുഹമ്മദ് ഷാഹിദ് ആലം മുഖ്യാതിഥിയായിരുന്നു.
ജിദ്ദ ഇന്ത്യന് കോണ്സുലേറ്റുമായി സഹകരിച്ച് ഗുഡ്വില് ഗ്ലോബല് ഇനിഷ്യെറ്റീവ് (ജിജിഐ) ‘സമഗ്ര മികവ്’ എന്ന ശീര്ഷകത്തില് ഇന്റര്നാഷണല് ഇന്ത്യന് സ്കൂള് ഓഡിറ്റോറിയത്തില് നടത്തിയ പരിപാടി വിദ്യാര്ഥികള്ക്ക് പുത്തനുണര്വും കൃത്യമായ ദിശാബോധവും നല്കുന്നതും ഉയരങ്ങളിലേക്ക് കുതിക്കാനുള്ള ത്വര ജനിപ്പിക്കുന്നതുമായിരുന്നു. ജിദ്ദ, ഖമീസ് മുഷൈത്ത്, യാമ്പു തുടങ്ങി സഊദി അറേബ്യയുടെ പടിഞ്ഞാറന് മേഖലയിലെ ഒരു ഡസനോളം ഇന്റര്നാഷണല് സ്കൂളുകളിലെ തെരഞ്ഞെടുത്ത ഇരുനൂറ്റമ്പതിലേറെ പ്രതിഭകള് ശില്പശാലയില് പങ്കെടുത്തു.
അഭിരുചിക്കിണങ്ങുന്ന മേഖല തെരഞ്ഞെടുത്ത് സ്ഥിരതയോടെ കഠിനാധ്വാനം ചെയ്യുകയും ഏത് സാഹചര്യത്തിലും മനസ്സാന്നിധ്യം കൈവിടാതിരിക്കുകയും ചെയ്താല് വിജയം സുനിശ്ചിതമാണെന്ന് സമാപന സെഷനില് മുഖ്യപ്രഭാഷണം നടത്തവെ കോണ്സല് ജനറല് ഷാഹിദ് ആലം വിദ്യാര്ഥികളെ ഉണര്ത്തി. ആരുടെയും സമ്മര്ദത്തിന് വഴിപ്പെടാതെ നല്ലവണ്ണം ആലോചിച്ചുറപ്പിച്ച ശേഷം അഭുരുചിക്കിണങ്ങുന്ന പഠനമേഖല തെരഞ്ഞെടുക്കണം. അങ്ങനെയെടുക്കുന്ന തീരുമാനമായിരിക്കും ജീവിതം കരുപ്പിടിപ്പിക്കുന്നത്. അച്ചടക്കവും അര്പ്പണബോധവും പ്രതിബദ്ധതയും ജീവിതവിജയത്തിന് അത്യന്താപേക്ഷിതമാണെന്നും അദ്ദേഹം ഓർമ്മിപ്പിച്ചു.
ജി.ജി. ഐ പ്രസിഡന്റ് ഹസന് ചെറൂപ്പ അധ്യക്ഷത വഹിച്ചു. ജിദ്ദ ഇന്റര്നാഷണല് മെഡിക്കല് സെന്റര് സി. ഇ. ഒയും സഊദി ഇന്ത്യന് ഹെല്ത്ത്കെയര് ഫോറം പ്രസിഡന്റുമായ ഡോ. അഷ്റഫ് അമീര്, ഇഫത്ത് യൂനിവേഴ്സിറ്റി കോളേജ് ഓഫ് എന്ജിനീയറിംഗ് ഡീന് ഡോ. അകീല സരിറെതെ, അബീര് മെഡിക്കല് ഗ്രൂപ്പ് പ്രസിഡന്റ് മുഹമ്മദ് ആലുങ്ങല്, ഇന്ത്യന് സ്കൂള് മാനേജിംഗ് കമ്മിറ്റി ചെയര്മാന് ഡോ. പ്രിന്സ് മുഫ്തി സിയാവുല് ഹസന്, പ്രിന്സിപ്പല് ഡോ. മുസഫര് ഹസന്, സകരിയാ ബിലാദി എന്നിവര് സംസാരിച്ചു. വിദ്യാര്ഥികളായ അന്വര് പര്വേസ് (അല്ജനൂബ് സ്കൂള്, ഖമീസ് മുശൈത്ത്), മറിയ അബ്ദുല് (ജിദ്ദ ഇന്ത്യന് സ്കൂള്)എന്നിവർ ശില്പശാലയെക്കുറിച്ച അനുഭവം പങ്കുവെച്ചു. അസിം സീഷാന് ചടങ്ങ് നിയന്ത്രിച്ചു. ജിജിഐ ജനറല് സെക്രട്ടറി ഇസ്ഹാഖ് പൂണ്ടോളി സ്വാഗതവും ട്രഷറര് ഇബ്രാഹിം ശംനാട് നന്ദിയും പറഞ്ഞു. സഹല് കാളമ്പ്രാട്ടില് ഖിറാഅത്ത് നടത്തി.
ഡോ. മുഷ്ക്കാത്ത് മുഹമ്മദ് അലി, കുഞ്ഞാന് പട്ടര്കടവന്, സിദ്ദീഖ് (അബീര് ഗ്രൂപ്പ്), അസിം സീഷാന് എന്നിവരും ക്ലാസുകള് നയിച്ച വിദഗ്ധരും കോണ്സല് ജനറലില്നിന്ന് ഉപഹാരങ്ങള് ഏറ്റുവാങ്ങി. പങ്കെടുത്ത വിദ്യാര്ഥികള്ക്ക് സര്ട്ടിഫിക്കറ്റുകളും സമ്മാനിച്ചു.
