റിയാദ്: ആഭ്യന്തര ഹജ്ജ് തീർത്ഥാടകർക്ക് അവരുടെ ഇഷ്ടപ്പെട്ട പാക്കേജ് ലഭിക്കുന്നതിന് അടുത്ത ഇലക്ട്രോണിക് നറുക്കെടുപ്പിനായി കാത്തിരിക്കാമെന്ന് ഹജ്ജ്, ഉംറ മന്ത്രാലയം വ്യക്തമാക്കി.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ബുധനാഴ്ച ഇ-നറുക്കെടുപ്പ് ഫലം മന്ത്രാലയം പ്രസിദ്ധീകരിച്ചപ്പോൾ നേരത്തെ തിരഞ്ഞെടുത്ത പാക്കേജുകളിൽ മാറ്റം വരുത്തിയതിന്റെ കാരണത്തെക്കുറിച്ചുള്ള ചില അപേക്ഷകരുടെ ചോദ്യങ്ങൾക്ക് മറുപടി പറയവെയാണ് മന്ത്രാലയം വ്യാഴാഴ്ച ഇക്കാര്യം വ്യക്തമാക്കിയത്.
അപേക്ഷകർക്ക് നേരത്തെ ഇഷ്ടപ്പെട്ട പാക്കേജുകളൊന്നും ഇ-നറുക്കെടുപ്പിൽ തിരഞ്ഞെടുക്കാൻ സാധിക്കാത്തതാണ് പാക്കേജിൽ മാറ്റം വരുത്താൻ കാരണമെന്ന് ഹജ്ജ് മന്ത്രാലയം വിശദീകരിച്ചു. നറുക്കെടുപ്പ് സംവിധാനത്തിലൂടെ മറ്റൊരു പാക്കേജ് നിർദ്ദേശിച്ചിരിക്കുന്നതിനാൽ അപേക്ഷകന് തങ്ങൾ നാമനിർദ്ദേശം ചെയ്ത പാക്കേജ് സ്വീകരിക്കുന്നതിനോ അല്ലെങ്കിൽ അവരുടെ ഇഷ്ടപ്പെട്ട പാക്കേജ് തിരഞ്ഞെടുക്കുന്നതിന് അടുത്ത നറുക്കെടുപ്പിനായി കാത്തിരിക്കുന്നതിനോ ഓപ്ഷൻ ഉണ്ടായിരിക്കുമെന്ന് മന്ത്രാലയം ചൂണ്ടിക്കാട്ടി.
ഈ വർഷത്തെ ഹജ്ജിനുള്ള ഇ-നറുക്കെടുപ്പിൽ 297,444 പൗരന്മാരും താമസക്കാരും രജിസ്റ്റർ ചെയ്തിട്ടുണ്ടെന്ന് മന്ത്രാലയം ബുധനാഴ്ച അറിയിച്ചു. അപേക്ഷകരിൽ 62 ശതമാനം പുരുഷന്മാരും 38 ശതമാനം സ്ത്രീകളുമാണ്.
തീർഥാടകരുടെ സ്ക്രീനിംഗും നോമിനേഷൻ നടപടികളും പൂർത്തിയായെന്നും, അപേക്ഷ അവലോകനം ചെയ്യുന്നതിനും രജിസ്ട്രേഷൻ നടപടികൾ പൂർത്തിയാക്കുന്നതിനുമായി യോഗ്യതയുള്ള അപേക്ഷകരെ ടെക്സ്റ്റ് സന്ദേശങ്ങളിലൂടെ ബന്ധപ്പെടുന്നുണ്ടെന്നും മന്ത്രാലയം അറിയിച്ചു. ബദൽ അല്ലെങ്കിൽ അധിക സീറ്റുകൾ ലഭ്യമാകുന്ന മുറയ്ക്ക് ഇ-നറുക്കെടുപ്പിൽ ഭാഗ്യം ലഭിക്കാത്തവർക്ക് അടുത്ത നറുക്കെടുപ്പിൽ അവസരം ലഭിക്കുമെന്ന് മന്ത്രാലയം വെളിപ്പെടുത്തി.
അപേക്ഷകരിൽ ഏറ്റവും ഉയർന്ന ശതമാനം (38 ശതമാനം) 31-40 വയസ്സിനിടയിലുള്ളവരാണ്. 23 ശതമാനം പ്രതിനിധീകരിക്കുന്ന 21-30 പ്രായത്തിലുള്ളവരും 21 ശതമാനം 41 നും 50 നും ഇടയിൽ പ്രായമുള്ളവരുമാണ്. 12 ശതമാനം പേർ 51-65 വയസ്സിനിടയിലുള്ളവരാണ്. ഏറ്റവും കുറവ് അപേക്ഷകർ 20 വയസ്സിന് താഴെയുള്ളവരാണ്.
