ജിദ്ദ: സഊദിയിലെ ജിദ്ദ ഇന്ത്യൻ കോൺസുലേറ്റിലേക്ക് മലയാളി ഉൾപ്പെടെ പുതുതായി രണ്ട് കോൺസൽമാർ കൂടി എത്തുന്നു. കണ്ണൂർ പഴയങ്ങാടി അബ്ദുൽ ജലീൽ, കർണാടകയിൽ നിന്നുള്ള മുഹമ്മദ് ഹാഷിം എന്നീ രണ്ടു പുതിയ കോൺസൽമാർ ആണ് ജിദ്ദയിൽ എത്തുക.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ഉടൻ തന്നെ ഇരുവരും ജിദ്ദ ഇന്ത്യൻ കോൺസുലേറ്റിൽ ചുമതലയേൽക്കുമെന്നാണ് റിപ്പോർട്ടുകൾ. ഇന്ത്യൻ വിദേശകാര്യ സർവീസിലെ റാങ്ക് ജേതാക്കളാണ് ഇരുവരും. ഔദ്യോഗിക ചുമതലയുടെ ഭാഗമായി ഇരുവരും അറബിക് ഭാഷാ പഠന കോഴ്‌സുമായി ബന്ധപ്പെട്ട് ഇപ്പോൾ കയ്‌റോയിലാണ്.
കണ്ണൂർ പഴയങ്ങാടി സ്വദേശിയായ അബ്ദുൽ ജലീൽ 2019 ബാച്ച് വിദേശകാര്യ സർവീസിൽ 434 ആമത് റാങ്ക് കരസ്ഥമാക്കിയ ആളാണ്. കണ്ണൂർ പഴയങ്ങാടി പി.ഇ.എസ് വാദിഹുദയിലെ പഠനശേഷം കോഴിക്കോട് എൻ.ഐ.ടിയിൽ നിന്ന് എൻജിനീയറിംഗ് ബിരുദത്തിനു ശേഷമാണ് സിവിൽ സർവ്വീസ് റാങ്ക് നേടിയത്. ബാംഗ്ലൂരിലും ദൽഹി ജാമിഅ മില്ലിയ്യയിലും പഠനം പൂർത്തിയാക്കിയ കർണ്ണാടക സ്വദേശി മുഹമ്മദ് ഹാഷിമും ഇതേ ബാച്ചിലെ 448 ആമത് റാങ്ക് കരസ്ഥമാക്കിയ ഐ.എഫ്.എസ് ബിരുദധാരിയാണ്.
ജിദ്ദ കോൺസുലേറ്റിലെ കമ്യൂണിറ്റി വെൽഫെയർ വിഭാഗം കോൺസൽ അബ്ദുൽ ഹലീം ദൽഹിയിലേക്ക് മടങ്ങിയ ഒഴിവിലായിരിക്കും അബ്ദുൽ ജലീലിന്റെ നിയമനമെന്നാണ് കരുതുന്നത്. ഹജ് കോൺസലിന്റെ കാലാവധി അവസാനിക്കുന്നതോടെ ഇദ്ദേഹത്തിന് ഹജ് വിഭാഗത്തിന്റെ ചുമതല നൽകാനാണ് സാധ്യതയെന്നും കരുതുന്നു.
