റിയാദ്: ട്രാഫിക് പിഴ തവണകളായി അടക്കാനും ചില കേസുകളിൽ പിഴയുടെ 25 ശതമാനം കിഴിവ് അനുവദിക്കുകയും ചെയ്യുന്ന ട്രാഫിക് നിയമത്തിലെ ഭേദഗതികൾ അംഗീകരിക്കാൻ ഉന്നത അധികാരികൾ ഉത്തരവ് പുറപ്പെടുവിച്ചു. ഉന്നത കേന്ദ്രങ്ങളെ ഉദ്ധരിച്ച് പ്രമുഖ പ്രാദേശിക പത്രമാണ് ഇക്കാര്യം റിപ്പോർട്ട് ചെയ്തിരിക്കുന്നത്.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ധനമന്ത്രിയുമായുള്ള കരാർ പ്രകാരം ആഭ്യന്തര മന്ത്രി നിശ്ചയിച്ച ചട്ടങ്ങൾക്കനുസൃതമായി ട്രാഫിക് പിഴയുടെ മൂല്യം 25 ശതമാനം വരെ കുറക്കാൻ അനുവദിക്കുന്നത് ഭേദഗതികളിൽ ഉൾപ്പെടുന്നുവെന്ന് വൃത്തങ്ങൾ വെളിപ്പെടുത്തി. ട്രാഫിക് നിയമത്തിന്റെ ആർട്ടിക്കിൾ 73-ലെ ഖണ്ഡിക 3-ൽ ഭേദഗതി വരുത്തിയാണ് തവണകളായി പിഴ അടക്കാനുള്ള സംവിധാനം ഒരുക്കുന്നത്. “ഒറ്റ കുറ്റത്തിനുള്ള ട്രാഫിക് പിഴ അടയ്ക്കുന്നത് സ്പ്ലിറ്റ് പേയ്മെന്റായി നൽകാം. ആഭ്യന്തര മന്ത്രി ധനമന്ത്രിയുമായി കരാറിൽ നിശ്ചയിച്ചിട്ടുള്ള ചട്ടങ്ങൾക്ക് അനുസൃതമായി ട്രാഫിക് പിഴ 25 ശതമാനത്തിൽ കൂടാത്ത നിലയിൽ ഇളവ് അനുവദിക്കുകയും ചെയ്യാമെന്ന് ഭേദഗതിയിൽ പറയുന്നു. ഇതുമായി ബന്ധപ്പെട്ട് ഒരു കരട് രാജകീയ ഉത്തരവ് തയ്യാറാക്കിയിട്ടുണ്ട്.
ആഭ്യന്തര മന്ത്രാലയം, നീതിന്യായ മന്ത്രാലയം, ധനകാര്യ മന്ത്രാലയം, സഊദി സെൻട്രൽ ബാങ്ക്, ഗ്രീവൻസ് ബോർഡ് എന്നിവ ഗതാഗത ലംഘനങ്ങൾക്കെതിരായ നിയമം കണ്ടുകെട്ടുന്നതിനും നടപ്പാക്കുന്നതിനുമുള്ള ആവശ്യമായ നടപടിക്രമങ്ങൾ അംഗീകരിച്ചിട്ടുണ്ട്. ആർട്ടിക്കിൾ 73 ന്റെ ഖണ്ഡിക 2-ലും ഭേദഗതി വരുത്തി. ഈ ഭേദഗതി പ്രകാരം, നിയമലംഘകന്റെ അപ്പീൽ, കോടതി നിരസിക്കുകയോ അല്ലെങ്കിൽ തനിക്കെതിരെ രേഖപ്പെടുത്തിയിരിക്കുന്ന ലംഘനത്തിന്റെ പിഴയുടെ തുക പരിഷ്കരിക്കുന്നതിന് ഒരു വിധി പുറപ്പെടുവിക്കുകയോ ചെയ്താൽ, ട്രാഫിക് നിയമലംഘകൻ 15 ദിവസത്തിൽ കൂടാത്ത കാലയളവിനുള്ളിൽ പിഴ അടയ്ക്കണം. എന്നാൽ, പിഴയടയ്ക്കാൻ 90 ദിവസം വരെ സാവകാശം നൽകുന്നതിന് ഈ കാലയളവിൽ നിയമലംഘകന് അപേക്ഷ സമർപ്പിക്കാമെന്നും ഭേദഗതി വ്യവസ്ഥ ചെയ്യുന്നു.
നിയമലംഘകന് നിശ്ചിത കാലയളവിനുള്ളിൽ പണമടയ്ക്കുന്നതിൽ പരാജയപ്പെടുകയാണെങ്കിൽ, ആഭ്യന്തര മന്ത്രാലയം, നീതിന്യായ മന്ത്രാലയം, ധനകാര്യ മന്ത്രാലയം, സഊദി സെൻട്രൽ ബാങ്ക്, ഗ്രീവൻസ് ബോർഡ് എന്നിവ സ്ഥാപിച്ച സംവിധാനം അനുസരിച്ച് നേരിട്ട് അയാളുടെ ബാങ്ക് ബാലൻസ് കണ്ടു കെട്ടും. ആഭ്യന്തര മന്ത്രാലയം, സാമ്പത്തിക മന്ത്രാലയവുമായും ഗതാഗത സുരക്ഷയ്ക്കുള്ള മന്ത്രിതല സമിതിയുമായുമുള്ള കരാർ പ്രകാരം, പൊതു സുരക്ഷയെ അപകടപ്പെടുത്തുന്നില്ലെങ്കിൽ, ജപ്തി ചെയ്യുന്നതിനും പിഴ നേരിട്ട് നടപ്പിലാക്കുന്നതിനും ബാധകമല്ലാത്ത ലംഘനങ്ങൾ നിർണ്ണയിക്കും.
