റിയാദ്: ലോക മുസ്ലിംകൾക്കും രാഷ്ട്ര നേതാക്കൾക്കും സഊദി ഭരണാധികാരി സൽമാൻ രാജാവും കിരീടവകാശി മുഹമ്മദ് ബിൻ സൽമാൻ രാജകുമാരനും റമദാൻ ആശംസകൾ നേർന്നു. ഇരുവരും ഇസ്ലാമിക രാഷ്ട്ര തലവന്മാർക്ക് അനുഗ്രഹീതമായ റമദാൻ മാസത്തിൽ അഭിനന്ദന സന്ദേശങ്ങൾ കൈമാറി. രാജാവിനും കിരീടവകാശിക്കും ഇസ്ലാമിക രാജ്യങ്ങളിലെ നേതാക്കന്മാരിൽ നിന്ന് അഭിനന്ദന സന്ദേശങ്ങൾ ലഭിച്ചിരുന്നു.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ഏവരുടെയും സൽപ്രവർത്തികൾ സ്വീകരിക്കട്ടെയെന്നും അഭിമാനത്തോടും ശാക്തീകരണത്തോടും കൂടി, കൂടുതൽ പുരോഗതിയും സമൃദ്ധിയും ശാശ്വതമായ സുരക്ഷിതത്വവും സ്ഥിരതയും സമാധാനവും നില നിൽക്കട്ടെയെന്ന് ഇരുവരും ആശംസിച്ചു.
സൽമാൻ രാജാവിനു വേണ്ടി ആക്ടിംഗ് മീഡിയ മന്ത്രി മജീദ് അൽ ഖസബി സന്ദേശം വായിച്ചു. വ്രതാനുഷ്ഠാനം ആത്മാവിനെ ശുദ്ധീകരിക്കാനും അഭിപ്രായ വ്യത്യാസങ്ങൾ ഉപേക്ഷിക്കാനുമുള്ള അവസരമായി കണക്കാക്കണമെന്ന് രാജാവ് വിശ്വാസികളോട് അഭ്യർത്ഥിച്ചു. നല്ല പ്രവൃത്തികളും ദൈവത്തോടുള്ള അനുസരണവും ഉണ്ടാവണം.
കൊറോണ വൈറസ് മഹാമാരി പിൻവാങ്ങലിനൊപ്പം കഷ്ടപ്പാടുകൾക്ക് ശേഷം വിശുദ്ധ റമദാൻ നമുക്ക് ആശ്വാസം നൽകുന്നത് ദൈവത്തിന്റെ കൃപയിൽ നിന്നാണ്. മഹാമാരിയെ തടയുന്നതിലും അതിന്റെ ദൂഷ്യഫലങ്ങളെ അതിജീവിക്കുന്നതിലും അതിശക്തമായ ശ്രമങ്ങൾ നടത്തി ഞങ്ങൾ നേടിയ വലിയ വിജയത്തിന് ഞങ്ങൾ ദൈവത്തിന് നന്ദി പറയുന്നു.
ഇരു വിശുദ്ധ മസ്ജിദുകൾക്കും ഹജ്ജ്, ഉംറ തീർഥാടകർക്കും വിശുദ്ധ മസ്ജിദുകളിലെ സന്ദർശകർക്കും സേവനം ചെയ്യാനുള്ള അവസരം നൽകി ദൈവം ഞങ്ങളെ ആദരിച്ചതിൽ ഞങ്ങൾ അഭിമാനിക്കുന്നു. പകർച്ചവ്യാധി പടരുന്നത് തടയാൻ പ്രഖ്യാപിച്ച മുൻകരുതൽ നടപടികളും പ്രതിരോധ പ്രോട്ടോക്കോളുകളും എടുത്തുകളഞ്ഞതിന് ശേഷം മക്കയിലെ ഹറം പള്ളിയുടെയും മദീനയിലെ പ്രവാചകന്റെ പള്ളിയുടെയും മുഴുവൻ ശേഷിയും ഉപയോഗിക്കാൻ സഊദി അറേബ്യ മടങ്ങിയതിൽ ഞങ്ങൾക്ക് സന്തോഷമുണ്ട്.
രാജ്യത്തിന്റെ അതിർത്തികളിൽ വിന്യസിച്ചിരിക്കുന്ന എല്ലാ സൈനിക മേഖലകളിലെയും ധീരരായ സായുധ സേനാംഗങ്ങൾക്ക് സൽമാൻ രാജാവ് നന്ദി പറഞ്ഞു. തങ്ങളുടെ രാജ്യത്തെ സേവിക്കുന്നതിൽ അവരുടെ അർപ്പണബോധത്തെ പ്രശംസിക്കുകയും അവരുടെ മഹത്തായ പരിശ്രമങ്ങൾക്ക് ഏറ്റവും മികച്ച പ്രതിഫലം നൽകാൻ ദൈവത്തോട് പ്രാർത്ഥിക്കുകയും ചെയ്തു. ഉപവാസം, പ്രാർത്ഥനകൾ, മറ്റ് സൽകർമ്മങ്ങൾ എന്നിവ സ്വീകരിക്കാനും രാജ്യത്തേയും ലോകത്തിലെ എല്ലാ രാജ്യങ്ങളെയും എല്ലാ തിന്മകളിൽ നിന്നും സംരക്ഷിക്കാനും രാജാവ് ദൈവത്തോട് ആവശ്യപ്പെട്ടു.
