ന്യൂഡൽഹി: ചരിത്രത്തിലാദ്യമായി റോയൽ സൗദി ലാൻഡ് ഫോഴ്സ് കമാൻഡർ ലെഫ്റ്റനന്റ് ജനറൽ ഫഹദ് ബിൻ അബ്ദുല്ല മുഹമ്മദ് അൽ-മുതൈർ ഔദ്യോഗിക സന്ദർശനത്തിനായി ന്യൂഡൽഹിയിലെത്തി. ഒരു സൗദി ലാൻഡ് ഫോഴ്സ് മേധാവി ഇന്ത്യയിലേക്കുള്ള ആദ്യത്തെ സന്ദർശനമാണിത്. രണ്ട് ശക്തികൾക്കിടയിൽ വളരുന്ന ഉഭയകക്ഷി പ്രതിരോധ ബന്ധത്തിന്റെ തെളിവാണ് സന്ദർശനമെന്ന് റിയാദിലെ ഇന്ത്യൻ എംബസി വാർത്താ കുറിപ്പിൽ പറഞ്ഞു.
ഫെബ്രുവരി 15-ന്, പ്രതിരോധ മന്ത്രാലയത്തിന്റെ സൗത്ത് ബ്ലോക്കിൽ സഊദി ലാൻഡ് ഫോഴ്സ് കമാൻഡറെ കരസേനാ മേധാവി ജനറൽ എംഎം നരവാനെ സ്വീകരിച്ചു. തുടർന്ന് ജനറൽ ഓഫീസർക്ക് പരമ്പരാഗത ഗാർഡ് ഓഫ് ഓണർ സമ്മാനിച്ചു. സൈനിക സഹകരണത്തിന്റെ നിലവിലെ അവസ്ഥയും പരസ്പര താൽപ്പര്യമുള്ള വിഷയങ്ങളും അവലോകനം ചെയ്യുന്നതിനുള്ള ചർച്ചകൾക്കും കൂടിക്കാഴ്ചകളും നടന്നു. സഊദി ജനറൽ, തന്റെ സന്ദർശന പരിപാടിയുടെ ഭാഗമായി ഇന്ത്യൻ സായുധ സേനയുടെ ശ്രേണിയുമായും കൂടിക്കാഴ്ച നടത്തും.
ഇരു കരസേനാ മേധാവികളും തമ്മിലുള്ള ഊഷ്മളമായ ബന്ധം സന്ദർശനം ഏറെ പ്രാധാന്യമർഹിക്കുന്നുണ്ട്. 2020 ഡിസംബറിൽ ഇന്ത്യൻ കരസേനാ മേധാവിയുടെ ചരിത്രപരമായ സന്ദർശനത്തിനു ശേഷമുള്ള ബന്ധങ്ങളുടെ അടിസ്ഥാനത്തിൽ, ഉഭയകക്ഷി ബന്ധങ്ങളുടെ സഹകരണ ധാരണകളുടെ പുരോഗതി വിലയിരുത്താൻ ഇരു കരസേനാ കമാൻഡർമാരും നിരന്തരം ടെലഫോണിൽ ചർച്ചകൾ നടത്തിയിരുന്നു.
2021 ഓഗസ്റ്റിൽ രാജ്യത്തിന്റെ കിഴക്കൻ സഊദിയിലെ ജുബൈലിൽ നടത്തിയ ഉയർന്ന തലത്തിലുള്ള ആശയവിനിമയങ്ങളുടെയും ആദ്യ ഉഭയകക്ഷി നാവിക അഭ്യാസമായ “അൽ മുഹദ്-അൽ ഹിന്ദി”യിലൂടെയും കഴിഞ്ഞ വർഷം ഇരു രാജ്യങ്ങളും തമ്മിലുള്ള പ്രതിരോധ ബന്ധത്തിൽ ശ്രദ്ധേയമായ ഉയർച്ചയുണ്ടായി.
കൊവിഡ് യാത്രാ നിയന്ത്രണങ്ങൾക്കിടയിലും സഊദി റോയൽ സായുധ സേനയിലെയും ഇന്ത്യൻ സായുധ സേനയിലെയും ഉദ്യോഗസ്ഥർ ഇരു രാജ്യങ്ങളിലെയും വിവിധ സൈനിക സ്ഥാപനങ്ങളിൽ പരിശീലനത്തിലാണ്. ഈ വർഷം രണ്ട് സൗഹൃദ രാജ്യങ്ങൾക്കിടയിൽ കൂടുതൽ കൈമാറ്റങ്ങളും പരിശീലന പ്രവർത്തനങ്ങളും നടക്കുമെന്നാണ് പ്രതീക്ഷ.
ഇന്റലിജൻസ് സഹകരണം, തീവ്രവാദ പ്രതിരോധം, ആർട്ടിഫിഷ്യൽ ഇന്റലിജൻസ്, സൈബർ സെക്യൂരിറ്റി എന്നീ മേഖലകളിൽ സഹകരണം കൂടുതൽ ശക്തമാക്കും. 2022 ന്റെ രണ്ടാം പകുതിയിൽ നടത്തുന്ന ആദ്യത്തെ കരസേനാ അഭ്യാസവും ഇരു തലവന്മാരും തമ്മിലുള്ള ചർച്ചകളിലെ മുഖ്യ അജണ്ടയാകും.
ഇന്ത്യ രാജ്യവുമായി നയതന്ത്രബന്ധം സ്ഥാപിച്ചതിന്റെ 75 വർഷം ആഘോഷിക്കുന്ന വേളയിൽ, പ്രതിരോധ സഹകരണം ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തിന്റെ പ്രധാന സ്തംഭങ്ങളിൽ ഒന്നാണ്. കിരീടാവകാശിയും പ്രതിരോധ മന്ത്രിയുമായി 2014-ൽ പ്രതിരോധ സഹകരണ കരാർ ഒപ്പിട്ടുകൊണ്ട് പുതിയൊരു സൗഹൃദ തലം കൂടി ഇരു രാജ്യങ്ങളും തമ്മിലുണ്ട്.
ഭരണാധികാരി സൽമാൻ ബിൻ അബ്ദുൽ അസീസ് രാജാവ്, കിരീടവകാശി മുഹമ്മദ് ബിൻ സൽമാൻ രാജകുമാരൻ എന്നിവരുടെ നേതൃത്വത്തിൽ സഊദി അറേബ്യയും ഇന്ത്യയും പ്രധാന പ്രാദേശിക സഖ്യ രാജ്യമെന്ന നിലയിൽ തന്ത്രപ്രധാനമായ പ്രതിരോധ പങ്കാളികളാകാനും മേഖല നേരിടുന്ന പൊതുവായ സുരക്ഷാ ആശങ്കകൾ പങ്കിടാനും ശ്രമിക്കുന്നുവെന്നും റിയാദിലെ ഇന്ത്യൻ എംബസി പ്രസ്താവനയിൽ പറഞ്ഞു.
