റിയാദ്: അഞ്ച് വയസിനും 11 വയസിനും ഇടയിൽ പ്രായമുള്ള കുട്ടികൾക്കുള്ള ഫൈസർ വാക്സിൻ സഊദി ആരോഗ്യ അധികൃതർ അംഗീകരിച്ചതായി ആരോഗ്യ ഡെപ്യൂട്ടി മന്ത്രി ഡോ: അബ്ദുല്ല അസിരി അറിയിച്ചു. കുട്ടികൾക്കുള്ള വാക്സിൻ ഡോസ് മുതിർന്നവരുടെ ഡോസിന്റെ പകുതിയായിരിക്കും നൽകുകയെന്നും അത് രണ്ട് ഘട്ടങ്ങളായി നൽകപ്പെടുമെന്നും അദ്ദേഹം പറഞ്ഞു.
കൊവിഡ് ബാധിച്ച കുട്ടികളിൽ, മിക്ക കേസുകളിലും രോഗലക്ഷണങ്ങൾ സൗമ്യമാണെന്നും അവരിൽ ഒരു ചെറിയ കൂട്ടം മാത്രമേ ഗുരുതരമായ രോഗങ്ങളും ആശുപത്രിയിൽ പ്രവേശിപ്പിക്കപ്പെടുന്നുള്ളൂവെന്നും അദ്ദേഹം കൂട്ടിച്ചേർത്തു. വാക്സിൻ എടുത്ത കുട്ടികളിൽ രോഗലക്ഷണങ്ങളൊന്നും റിപ്പോർട്ട് ചെയ്തിട്ടില്ലെന്നും അദ്ദേഹം പറഞ്ഞു.
ഗുരുതരമായ രോഗങ്ങൾ തടയുന്നത് ഉൾപ്പെടെയുള്ള പ്രതിരോധ കുത്തിവയ്പ്പിന്റെ ലക്ഷ്യങ്ങൾ കൈവരിക്കുന്നത് വരെ വാക്സിൻ ഡോസുകൾ നൽകുന്നത് തുടരും. വാക്സിനുകൾ മഹാമാരി വ്യാപനം തടയുന്നു. ആശുപത്രിയിൽ പ്രവേശിപ്പിക്കപ്പെടുന്ന കേസുകൾ കുറയ്ക്കുന്നതിനൊപ്പം വൈറസ് വകഭേദം ഉൾപ്പെടെയുള്ള പകർച്ചവ്യാധികൾ നിയന്ത്രിക്കുന്നുവെന്നും അദ്ദേഹം പറഞ്ഞു.
കുറഞ്ഞ വരുമാനമുള്ള രാജ്യങ്ങളിൽ വാക്സിനുകൾ നൽകുന്നത് തുടരുമ്പോൾ വരും വർഷങ്ങളിൽ ചില ഗ്രൂപ്പുകൾ വാക്സിൻ എടുക്കേണ്ടതായി വരും. “കൊറോണ വൈറസ് ഇൻഫ്ലുവൻസ പോലെ നമ്മോടൊപ്പം തുടരും, പക്ഷേ വൈറസ് ക്രമേണ കുറയും,” അദ്ദേഹം പറഞ്ഞു. വാക്സിന്റെ ബൂസ്റ്റർ ഡോസ് ശാശ്വതമായ സംരക്ഷണം നൽകും. ഒമിക്രോൺ വകഭേദത്തിന്റെ വ്യാപനത്തെയും തുടർച്ചയായ സാന്നിധ്യത്തെയും തുടർന്ന് ബൂസ്റ്റർ ഡോസിന്റെ ആവശ്യകത വർദ്ധിച്ചു.
2021©Malayalam Press