നടന് രജനികാന്തിന് ഗോള്ഡന് വിസ നല്കി യുഎഇ. അബുദാബി കള്ച്ചറല് ആന്റ് ടൂറിസം വകുപ്പിന്റെ ചെയര്മാന് മുഹമ്മദ് ഖലീഫ അല് മുബാറക്കാണ് താരത്തിന് വിസ കൈമാറിയത്. ലുലു ഗ്രൂപ്പ് ചെയര്മാന് എംഎ യൂസഫലി ചടങ്ങില് മുഖ്യാതിഥിയായിരുന്നു.
‘ഗോള്ഡന് വിസ ലഭിച്ചതില് അതിയായ സന്തോഷവും അഭിമാനവും തോന്നുന്നു. അബുദാബി സര്ക്കാരിനും സുഹൃത്ത് യൂസഫലിക്കും നന്ദി പറയുന്നു.’, രജനികാന്ത് പറഞ്ഞു.
രണ്ട് ദിവസങ്ങള്ക്ക് മുന്പ് എംഎ യൂസഫലി സന്ദര്ശിക്കാന് രജനികാന്ത് അബുദാബിയിലെ വീട്ടിലെത്തിയിരുന്നു. യൂസഫലിയുടെ ബിസിനസ് ആസ്ഥാനവും രജനി സന്ദര്ശിച്ചു. ലുലു ഗ്രൂപ്പ് ഇന്റര്നാഷണലിന്റെ ഗ്ലോബല് ഹെഡ് ക്വാര്ട്ടേഴ്സിലാണ് രജനികാന്ത് ആദ്യം എത്തിയത്. അതിന് ശേഷം യൂസഫലിയുടെ വീട്ടില് ഏറെ നേരം ചിലവഴിച്ച ശേഷമാണ് രജനികാന്ത് മടങ്ങിയത്.
