ദുബൈ: ഏഴു രാജ്യങ്ങൾ ചുറ്റി മലപ്പുറത്ത് സമാപിക്കുന്ന ബൈക്ക് യാത്രയുമായി യുവാവ്. യു എ ഇ യിൽ നിന്ന് എഴുപത് ദിവസം കൊണ്ട് ഏഴ് രാജ്യങ്ങൾ ചുറ്റി പെരിന്തൽമണ്ണയിലേക്കാണ് ബൈക്ക് യാത്ര. പെരിന്തൽമണ്ണ സ്വദേശിയായ നിഷാദ് ആണ് ലോക സമാധാനത്തിന്‍റെ സന്ദേശവുമായി ‘ദ പ്രൗഡ് ഇന്ത്യൻ’ എന്ന ആപ്തവാക്യവുമായി ബൈക്ക് യാത്രക്ക് തുടക്കം കുറിച്ചത്.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
എഴുപത് ദിവസം കൊണ്ട് ഏഴു രാജ്യങ്ങളിലൂടെ 15,000 കിലോമീറ്ററാണ് നിഷാദ് ബൈക്കിൽ സഞ്ചരിക്കുക. യു.എ.ഇ, ഇറാൻ, പാകിസ്താൻ, അഫ്ഗാനിസ്താൻ, തജികിസ്താൻ, നേപ്പാൾ എന്നീ രാജ്യങ്ങളിലൂടെ ഇന്ത്യയിലെത്തി തന്റെ നാടായ പെരിന്തൽമണ്ണയിൽ അവസാനിക്കുന്ന രീതിയിലാണ് യാത്ര ക്രമകരിച്ചിരിക്കുന്നത്. യു എ ഇ to പെരിന്തൽമണ്ണ ബൈക്ക് യാത്രക്ക് കഴിഞ്ഞ ദിവസം ദുബൈയിൽ നിന്ന് തുടക്കം കുറിച്ചു.
ഐ.എൻ.ഡി ഐ (IND i) എന്നുപേരിട്ടിരിക്കുന്ന ലോക സമാധാനയാത്രയുടെ ഫ്ലാഗ്ഓഫ് കറാമയിലെ ബുർജ്മാൻ പരിസരത്ത് നടന്ന ചടങ്ങിൽ വെൽത്ത് ഐ ഗ്രൂപ് ഓഫ് കമ്പനി സി.ഇ.ഒ വിഗ്‌നേഷ് വിജയകുമാർ മേനോൻ നിർവഹിച്ചു. അഡ്വ. ഹാഷിക് തൈക്കണ്ടി അധ്യക്ഷത വഹിച്ചു. അനൂപ് അരിത്തോട്ടം സ്വാഗതം പറഞ്ഞു.
170 ഓളം രാജ്യങ്ങളിലെ ജനങ്ങൾ സമാധാനത്തോടെ അധിവസിക്കുന്ന യു.എ.ഇയിൽനിന്ന് യാത്രതിരിക്കാൻ സാധിച്ചതിൽ ഒരു പ്രവാസിയെന്ന നിലയിൽ സന്തോഷമുണ്ടെന്ന് നിഷാദ് പറഞ്ഞു. യാത്ര പൂർത്തീകരിക്കാൻ എല്ലാവരുടെയും പ്രാർഥന ഉണ്ടാവണമെന്നും നിഷാദ് ചൂണ്ടിക്കാട്ടി.
