റിയാദ്: രാജ്യത്തെ കൊവിഡ് കേസുകളിൽ ആശ്വാസവാർത്തയുമായി സഊദി ആരോഗ്യ മന്ത്രാലായം വക്താവ്. ഇന്ന് നടത്തിയ വാർത്താസമ്മേളനത്തിലാണ് ആരോഗ്യ മന്ത്രാലയ വക്താവ് ഡോ: മുഹമ്മദ് അബ്ദുൽ ആലി രാജ്യത്തെ കൊറോണ വൈറസ് സംബന്ധമായി ആശ്വാസമായ പ്രതികരണം നടത്തിയത്. രാജ്യത്തെ വൈറസ് ബാധ നിയന്ത്രണവിധേയമാണെന്ന് അദ്ദേഹം വ്യക്തമാക്കി. കൊറോണ വൈറസ് പാൻഡെമിക്കിന്റെ സംഭവവികാസങ്ങളും പകർച്ചവ്യാധി സാഹചര്യങ്ങളും അവലോകനം ചെയ്യുകയായിരുന്നു അദ്ദേഹം.
രാജ്യത്തെ എപ്പിഡെമിയോളജിക്കൽ സ്ഥിതി നിയന്ത്രണ വിധേയമാണ്. കഴിഞ്ഞ ദിവസങ്ങളിൽ ദിവസേനയുള്ള വൈറസ് ബാധിതരുടെയും ഗുരുതരമായ കേസുകളുടെയും എണ്ണത്തിൽ കുറവുണ്ടായിട്ടുണ്ടെന്ന് അദ്ദേഹം ചൂണ്ടിക്കാട്ടി.
ഒമിക്രോൺ വൈറസ് വകഭേദം രണ്ടുതവണ ഉണ്ടാകാനുള്ള സാധ്യതയെക്കുറിച്ച് ചോദിച്ചപ്പോൾ, വകഭേദ അണുബാധയിൽ നിന്ന് ലഭിക്കുന്ന പ്രതിരോധശേഷി മുൻ വൈറസ് വകഭേദ അണുബാധയിൽ നിന്ന് നേടിയതിനേക്കാൾ കുറവാണെന്നും അതിനാൽ ഒരു വ്യക്തിക്ക് ഇത് തവണ വന്നേക്കാമെന്നും അദ്ദേഹം പറഞ്ഞു.
ഒമിക്രോൺ വകഭേദത്തിന്റെ ഇൻകുബേഷൻ കാലയളവ് മറ്റ് വകഭേദത്തേക്കാൾ കുറവാണ്. ഒമിക്രോണുകളുടെ ഇൻകുബേഷൻ കാലയളവ് 3 ദിവസം വരെയാണെന്ന് അദ്ദേഹം പറഞ്ഞു. അതേസമയം, രോഗലക്ഷണ പ്രവർത്തനത്തിന്റെയും അണുബാധ പകരുന്നതിന്റെയും കാലയളവ് 5 മുതൽ 7 ദിവസം വരെ നീളുമെന്നും അദ്ദേഹം പറഞ്ഞു.
