കൊല്ലം: കൊട്ടാരക്കരയിലെ ഡോക്ടര് വന്ദനദാസ് വധക്കേസിലെ കുറ്റക്കാരന് എന്ന് കണ്ടെത്തിയ പ്രതി സന്ദീപിന്റെ ശിക്ഷാവിധി ഇന്ന്. ശിക്ഷാവിധിയിന്മേല് ഉള്ള വാദങ്ങള് കൊല്ലം അഡിഷണല് സെഷന്സ് കോടതിയില് കഴിഞ്ഞ ദിവസം പൂര്ത്തിയായിരുന്നു.
അപൂര്വങ്ങളില് അപൂര്വമായ കുറ്റകൃത്യം ആയി കണക്കാക്കി വധശിക്ഷ നല്കണമെന്ന് പ്രോസിക്യൂഷന് ആവശ്യപ്പെട്ടു. കുറ്റം ചെയ്തത് കരുതികൂട്ടി അല്ലെന്നും പരമാവധി കുറഞ്ഞ ശിക്ഷ നല്കണം എന്നും പ്രതിഭാഗവും വാദിച്ചു. പ്രായശ്ചിത്തം എന്ത് വേണമെങ്കിലും ചെയ്യാമെന്നും പ്രതി പറഞ്ഞു. പ്രായമായ മാതാവിനെ കാണാന് അവസരം നല്കണമെന്ന് പ്രതി കോടതിയില് ആവശ്യപ്പെട്ടു. ശിക്ഷയില് നിന്ന് രക്ഷപ്പെടാനുള്ള ബാലിശമായ കാരണങ്ങള് മാത്രമാണ് പ്രതി സന്ദീപിന്റേതാണെന്നായിരുന്നു പ്രോസിക്യൂഷന്റെ വാദം. പശ്ചാത്താപത്തിന്റെ ഒരു കണിക പോലും പ്രതിയില് നിന്ന് ഉണ്ടായിട്ടില്ലെന്നും പ്രോസിക്യൂഷന് പറഞ്ഞു.
സെഷന്സ് ജഡ്ജ് പി. എന് വിനോദ് ആണ് ശിക്ഷ വിധിക്കുന്നത്. വിധി കേള്ക്കാന് വന്ദനയുടെ മാതാപിതാക്കള് ഉള്പ്പെടെ കോടതിയില് എത്തും. കൊലപാതകം, വധശ്രമം, സ്ത്രീകള്ക്കെതിരെയുള്ള അതിക്രമം ഉള്പ്പെടെ പോലീസ് ചുമത്തിയ കുറ്റങ്ങളില് എല്ലാം പ്രതി കുറ്റക്കാരന് എന്നാണ് കോടതിയുടെ കണ്ടെത്തല്. കരുതികൂട്ടി ചെയ്തത് അല്ലെന്നും പെട്ടെന്ന് ഉണ്ടായ മാനസിക പ്രശ്നങ്ങളെ തുടര്ന്നാണ് അതിക്രമം നടത്തിയതെന്നുമായിരുന്നു പ്രതിഭാഗത്തിന്റെ വാദം.
