- പ്രവാസി മലയാളികൾക്ക് അഭിമാനമായി ഈ കലാകാരി!
ജുബൈൽ: കിഴക്കൻ സഊദി അറേബ്യയിലെ ജുബൈലിൽ താമസിക്കുന്ന പ്രവാസി മലയാളി കലാകാരി നീനു സാംസൺ, ആർട്ട് ആൻഡ് ക്രാഫ്റ്റ് രംഗത്ത് പുതിയൊരു നേട്ടം കുറിച്ചു. ഗിന്നസ് വേൾഡ് റെക്കോർഡ് നേടിയ നീനു, പ്രവാസി മലയാളി സമൂഹത്തിനുള്ള അഭിമാനമായി മാറി.
“ഏറ്റവും നീളം കൂടിയ പേപ്പർ പൂക്കളുടെ നിര ”എന്ന കാറ്റഗറിയിലാണ് ഗിന്നസ് റെക്കോർഡ്. വെറും 4 മണിക്കൂർ 39 മിനിറ്റിനുള്ളിൽ 1,101 പേപ്പർ പൂക്കൾ നിർമ്മിച്ച്, 574 അടി നീളമുള്ള പൂച്ചന്തം ഒരുക്കിയതാണ് ഈ അതുല്യമായ ബഹുമതിക്ക് കാരണം. ഈ റെക്കോർഡിലൂടെ, സ്വന്തം കഴിവിനെ മലയാളി craft culture-ന്റെ ഭംഗിയും നീനു അന്താരാഷ്ട്ര തലത്തിൽ തെളിയിച്ചു.
പത്തുവർഷത്തിലധികമായി ആർട്ട് ആൻഡ് ക്രാഫ്റ്റ് മേഖലയിൽ സജീവമായ നീനുവിന് മുൻകൂട്ടി തന്നെ ലഭിച്ചിട്ടുള്ളത് മൂന്ന് ഇന്ത്യ ബുക്ക് ഓഫ് റെക്കോർഡുകളും, മൂന്ന് ഏഷ്യ ബുക്ക് ഓഫ് റെക്കോർഡുകളും ആണ്. പ്രത്യേകിച്ച് പേപ്പർ ഫ്ലവർ ഡിസൈൻ എന്ന അതുല്യ വിദഗ്ധതയാണ് അവരെ മറ്റുള്ളവരിൽ നിന്നും വ്യത്യസ്തയാക്കുന്നത്.
2009 മുതൽ ജുബൈലിൽ പ്രവാസിയായുള്ള നീനുവിന്റെ കലാപ്രവർത്തനങ്ങൾ ജുബൈൽ മലയാളി സമാജത്തിലെയും പ്രവാസി കുടുംബങ്ങളിലെയും സ്ത്രീകളെ വലിയ തോതിൽ പ്രചോദിപ്പിക്കുകയും ചെയ്യുന്നുണ്ട്.
ആലപ്പുഴ ജില്ലക്കാരിയായ നീനു, ഭർത്താവ് സാംസൺ ജേക്കബ്, മക്കളായ ആറോൺ, ആഞ്ചലീന (ഇന്റർനാഷണൽ ഇന്ത്യൻ സ്കൂൾ, ജുബൈൽ) എന്നിവരോടൊപ്പം ജുബൈലിൽ താമസിച്ചു വരികയാണ്.
നീനുവിന്റെ അംഗീകാരത്തിൽ ജുബൈൽ മലയാളി സമാജം അഭിനന്ദനം അറിയിച്ചു. ഹൃദയം നിറഞ്ഞ അഭിനന്ദനങ്ങൾ അറിയിച്ച ജുബൈൽ മലയാളി സമാജംകലയുടെ ലോകത്ത് ഇനിയും നീണ്ട യാത്രയാവട്ടെ എന്ന് ആശംസിച്ചു.
