സഊദിയിൽ സ്വകാര്യ മേഖലയിലെ 12 തസ്തികകളിൽ 70% സ്വദേശിവൽക്കരണം പ്രാബല്യത്തിൽ

റിയാദ്: സഊദി അറേബ്യയിൽ സ്വകാര്യ മേഖലയിലെ പർച്ചേസിംഗ് (Procurement/Purchasing) തസ്തികകളിൽ സ്വദേശിവൽക്കരണം 70 ശതമാനമായി ഉയർത്തിയുള്ള ഉത്തരവ് പ്രാബല്യത്തിൽ വന്നു. 2026 മേയ് 31 ഞായറാഴ്ച മുതലാണ് നിയമം നടപ്പിലായതെന്ന് സഊദി മാനവവിഭവശേഷി, സാമൂഹിക വികസന മന്ത്രാലയം അറിയിച്ചു. പർച്ചേസിംഗ് മേഖലയുമായി ബന്ധപ്പെട്ട തസ്തികകളിൽ മൂന്നോ അതിലധികമോ ജീവനക്കാരുള്ള സ്ഥാപനങ്ങൾക്കാണ് ഈ നിയമം ബാധകമാകുക.

സഊദി യൂണിഫൈഡ് ക്ലാസിഫിക്കേഷൻ ഓഫ് പ്രൊഫഷൻസ് അംഗീകരിച്ച നിർവചനങ്ങളും തൊഴിൽ നാമങ്ങളും അനുസരിച്ചാണ് ഈ നിയന്ത്രണം ഏർപ്പെടുത്തിയിരിക്കുന്നത്. രാജ്യത്തെ തൊഴിൽ വിപണി തന്ത്രത്തി​െൻറ ലക്ഷ്യങ്ങൾ കൈവരിക്കുന്നതിനും പ്രൊക്യുർമെൻറ്​ മേഖലയിൽ സ്വദേശികളായ പൗരന്മാർക്ക് കൂടുതൽ അവസരങ്ങൾ ലഭ്യമാക്കുന്നതിനുമായി മന്ത്രാലയം നടത്തിവരുന്ന നിരന്തര ശ്രമങ്ങളുടെ ഭാഗമായാണ് ഈ നടപടി

പർച്ചേസിംഗ് മേഖലയിലെ താഴെ പറയുന്ന 12 തസ്തികകളെയാണ് ഈ പുതിയ തീരുമാനത്തിൽ ഉൾപ്പെടുത്തിയിരിക്കുന്നത്:

• പർച്ചേസിംഗ് മാനേജർ (Purchasing Manager),
• പർച്ചേസിംഗ് പ്രതിനിധി (Purchasing Representative),
• കോൺട്രാക്ട് മാനേജർ (Contract Manager),
• സ്റ്റോർ കീപ്പർ (Storekeeper),
• ലോജിസ്റ്റിക്സ് സർവീസ് മാനേജർ (Logistics Services Manager),
• വെയർഹൗസ് മാനേജർ (Warehouse Manager), ടെൻഡർ സ്പെഷ്യലിസ്റ്റ് (Tenders Specialist)
• പർച്ചേസിംഗ് സ്പെഷ്യലിസ്റ്റ് (Purchasing Specialist),
• ഇ-കോമേഴ്സ് സ്പെഷ്യലിസ്റ്റ് (E-Commerce Specialist),
• മാർക്കറ്റ് റിസർച്ച് സ്പെഷ്യലിസ്റ്റ് (Market Research Specialist),
• വെയർഹൗസ് സ്പെഷ്യലിസ്റ്റ് (Warehouse Specialist),
• പ്രൈവറ്റ് ബ്രാൻഡ് സപ്ലൈ സ്പെഷ്യലിസ്റ്റ് (Private Brand Supply Specialist)

പുതിയ നിയമം സ്ഥാപനങ്ങൾ കൃത്യമായി പാലിക്കുന്നുണ്ടെന്ന് ഉറപ്പുവരുത്താൻ മാനവവിഭവശേഷി മന്ത്രാലയത്തിന്റെ കീഴിലുള്ള പ്രത്യേക പരിശോധനാ സംഘങ്ങൾ ഫീൽഡ് പരിശോധനകൾ ആരംഭിച്ചു കഴിഞ്ഞു. നിർദ്ദിഷ്ട സ്വദേശിവൽക്കരണ അനുപാതം സ്ഥാപനങ്ങൾ നടപ്പിലാക്കുന്നുണ്ടോ എന്ന് ഈ സംഘം നിരീക്ഷിക്കും.

സ്വദേശി ഉദ്യോഗാർത്ഥികൾക്ക് കൂടുതൽ സുരക്ഷിതവും ഉൽപ്പാദനക്ഷമവുമായ തൊഴിൽ അന്തരീക്ഷം ഒരുക്കുകയാണ് ഇതിലൂടെ മന്ത്രാലയം ലക്ഷ്യമിടുന്നത്. നിയമം നടപ്പിലാക്കാൻ നൽകിയിരുന്ന ഇളവ് കാലാവധി അവസാനിച്ച സാഹചര്യത്തിൽ, നിയമലംഘനം നടത്തുന്ന സ്ഥാപനങ്ങൾക്കെതിരെ കർശനമായ നിയമനടപടികളും പിഴയും ചുമത്തുമെന്നും മന്ത്രാലയം മുന്നറിയിപ്പ് നൽകി.