- റിയാദിൽ നാല് ബാലിസ്റ്റിക് മിസൈലുകൾ തകർത്തു
- കിഴക്കൻ പ്രവിശ്യയിൽ എണ്ണപാടങ്ങൾ കേന്ദ്രീകരിച്ചു ഡ്രോണുകൾ, 10 ഡ്രോണുകൾ തടഞ്ഞു നശിപ്പിച്ചു
- ഇന്റർസെപ്റ്ററിൽ നിന്നുള്ള അവശിഷ്ടങ്ങൾ പ്രിൻസ് സുൽത്താൻ വ്യോമതാവളത്തിന് സമീപം വീണു, യാതൊരു നാശനഷ്ടങ്ങൾ ഉണ്ടായിട്ടില്ലെന്ന് റിപ്പോർട്ട് .
റിയാദ്: സഊദി അറേബ്യക്ക് നേരെ വ്യാപക ഡ്രോൺ, മിസൈൽ ആക്രമണ ശ്രമം. റിയാദ് നഗരത്തിനു നേരെ നാല് ബാലിസ്റ്റിക് മിസൈലുകൾ എത്തിയതായും ഇവയെ തടഞ്ഞു നിർത്തി തകർത്തതായും പ്രതിരോധ മന്ത്രാലയത്തിന്റെ ഔദ്യോഗിക വക്താവ് മേജർ ജനറൽ തുർക്കി അൽ-മാലികി അറിയിച്ചു. കിഴക്കൻ പ്രവിശ്യയിൽ 10 ഡ്രോണുകളും രണ്ട് ബാലിസ്റ്റിക് മിസൈലുകളും തടഞ്ഞു നശിപ്പിച്ചതായും അദ്ദേഹം കൂട്ടിച്ചേർത്തു. കൂടാതെ റിയാദിലെ ഡിപ്ലോമാറ്റിക് ക്വാർട്ടറിലേക്ക് അടുക്കാൻ ശ്രമിക്കുന്നതിനിടെ രണ്ട് ഡ്രോണുകളും വെടിവച്ചിട്ടു.
റിയാദിലേക്ക് വിക്ഷേപിച്ച നാല് ബാലിസ്റ്റിക് മിസൈലുകൾ തടഞ്ഞുനിർത്തി നശിപ്പിച്ചതിന്റെ ഫലമായി ഇന്റർസെപ്ഷനിൽ നിന്നുള്ള അവശിഷ്ടങ്ങൾ തലസ്ഥാനത്തിന്റെ വിവിധ പ്രദേശങ്ങളിൽ പതിച്ചു. എങ്കിലും, പ്രാഥമിക വിലയിരുത്തലുകൾ പ്രകാരം നാശനഷ്ടങ്ങളോ പരിക്കുകളോ ഇല്ലെന്നാണ് സൂചന. അൽ-ഖർജ് പ്രവിശ്യയിലേക്ക് വിക്ഷേപിച്ച ബാലിസ്റ്റിക് മിസൈൽ തകർത്തതോടെ ഇന്റർസെപ്റ്റിൽ നിന്നുള്ള അവശിഷ്ടങ്ങൾ പ്രിൻസ് സുൽത്താൻ വ്യോമതാവളത്തിന് സമീപം പതിച്ചു. എങ്കിലും നാശനഷ്ടങ്ങൾ റിപ്പോർട്ട് ചെയ്തിട്ടില്ല.
അൽ ഖർജ് ഗവർണറേറ്റിന് ഭീഷണിയാകുന്ന ഒരു അപകടത്തെക്കുറിച്ച് മുന്നറിയിപ്പ് നൽകുന്നതിനായി ജനറൽ ഡയറക്ടറേറ്റ് ഓഫ് സിവിൽ ഡിഫൻസ് നാഷണൽ ഏർലി വാണിംഗ് പ്ലാറ്റ്ഫോം വഴി ഒരു മുൻകൂർ മുന്നറിയിപ്പ് നൽകി. കിഴക്കൻ പ്രവിശ്യയിലും മുന്നറിയിപ്പ് നൽകി. താമസക്കാരോട് ശാന്തത പാലിക്കാനും ഔദ്യോഗിക നിർദ്ദേശങ്ങൾ പാലിക്കാനും കെട്ടിടങ്ങൾക്കുള്ളിലെ ഏറ്റവും അടുത്തുള്ള സുരക്ഷിത സ്ഥലത്തേക്ക് ഉടൻ പോകാനും അപകടം ഇല്ലാതാകുന്നതുവരെ ജനാലകൾ, ഗ്ലാസ്, തുറന്ന പ്രദേശങ്ങൾ എന്നിവയിൽ നിന്ന് അകന്നു നിൽക്കാനും ആവശ്യപ്പെട്ടു.
പ്രതിരോധ മന്ത്രാലയത്തിന്റെ കണക്കനുസരിച്ച്, വ്യോമ പ്രതിരോധ സേനയും വ്യോമസേനയും ഇതിനകം 405 ഡ്രോണുകൾ, 30 ബാലിസ്റ്റിക് മിസൈലുകൾ, 7 ക്രൂയിസ് മിസൈലുകൾ എന്നിവ വിജയകരമായി തടഞ്ഞു നശിപ്പിച്ചു, അവയിൽ ഭൂരിഭാഗവും കിഴക്കൻ പ്രവിശ്യയെയും റിയാദിനെയും ലക്ഷ്യം വച്ചായിരുന്നു.
അൽ-ഖർജിലെ പ്രിൻസ് സുൽത്താൻ എയർ ബേസ്, ഷൈബ എണ്ണപ്പാടം തുടങ്ങിയ ഊർജ്ജ സൗകര്യങ്ങളിലാണ് ആക്രമണങ്ങൾ കേന്ദ്രീകരിച്ചത്. ലക്ഷ്യത്തിലെത്തുന്നതിനുമുമ്പ് വ്യോമസേന എല്ലാ മിസൈലുകളും ഡ്രോണുകളും വിജയകരമായി തടഞ്ഞു നശിപ്പിച്ചു.
