തിരുവനന്തപുരം: നിയമസഭാ തിരഞ്ഞെടുപ്പ് പ്രചാരണത്തിനു തിരുവനന്തപുരത്ത് നേമം മണ്ഡലത്തിൽ തുടക്കം കുറിച്ച് ബിജെപി. നേമം മണ്ഡലത്തിലെ കാലടിയിലെ തളിയൽ ജംക്ഷനിൽ താമര ചിഹ്നത്തിനു നിറം നൽകിയാണ് ചുവരെഴുത്തിനു ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ തുടക്കം കുറിച്ചത്. തുടർന്ന് ‘മാറാത്തത് ഇന്ന് മാറും’ എന്ന മുദ്രാവാക്യവും ചുവരിലെഴുതി.
ഔദ്യോഗികമായി സ്ഥാനാർഥി പ്രഖ്യാപനം വരാത്തതിനാൽ മത്സരിക്കുന്ന സ്ഥാനാർഥിയുടെ പേര് ഒഴിച്ചിട്ടാണ് നേമത്തെ ചുവരെഴുത്ത് ആരംഭിച്ചത്. രണ്ട് മാസം മുൻപ് നേമത്തു താൻ മത്സരിക്കുമെന്ന് രാജീവ് ചന്ദ്രശേഖർ പറഞ്ഞിരുന്നു. ലോക്സഭാ തിരഞ്ഞെടുപ്പിൽ മത്സരിച്ചപ്പോൾ ലഭിച്ച പിന്തുണ വലുതായിരുന്നെന്നും നേമം മണ്ഡലത്തിൽ മത്സരിക്കാൻ സന്നദ്ധനാണെന്നും ചുവരെഴുത്തിനു എത്തിയപ്പോൾ അദ്ദേഹം മാധ്യമങ്ങളോടു പറഞ്ഞു. മത്സരിക്കാനുള്ള ആഗ്രഹം താൻ രണ്ട് മാസം മുൻപേ കേന്ദ്ര നേതൃത്വത്തെ അറിയിച്ചിട്ടുണ്ടെന്നും അദ്ദേഹം വെളിപ്പെടുത്തി.
കേരളത്തിൽ നിയമസഭാ ചരിത്രത്തിൽ ബിജെപി ആദ്യമായി അക്കൗണ്ട് തുറന്ന മണ്ഡലമാണ് നേമം. 2025 ഡിസംബറിലാണ് നേമത്ത് താൻ മത്സരിക്കുമെന്ന് രാജീവ് ചന്ദ്രശേഖർ പരസ്യമായി പ്രഖ്യാപിച്ചത്. അതേസമയം സംഘടനാ രീതികൾക്ക് വിരുദ്ധമായാണ് സംസ്ഥാന അധ്യക്ഷന്റെ സ്വയം പ്രഖ്യാപനം എന്നത് അന്ന് പാർട്ടിക്കുള്ളിലടക്കം ചർച്ചയായിരുന്നു.
