കോഴിക്കോട്: 2026-ലെ ഹജ്ജ് കർമ്മത്തിന് സംസ്ഥാന ഹജ്ജ് കമ്മിറ്റി മുഖേന അപേക്ഷിച്ച് കാത്തിരിപ്പിലായിരുന്ന കൂടുതൽ പേർക്ക് തീർത്ഥാടനത്തിന് അവസരം ലഭിച്ചു. നറുക്കെടുപ്പിലൂടെ നിലവിൽ വെയ്റ്റിംഗ് ലിസ്റ്റിൽ ഉൾപ്പെട്ട ക്രമ നമ്പർ 5341 മുതൽ 5369 വരെയുള്ള അപേക്ഷകർക്കാണ് പുതുതായി അവസരം ലഭിച്ചിരിക്കുന്നത്.
തിരഞ്ഞെടുക്കപ്പെട്ടവർ ആദ്യ ഗഡുവും രണ്ടാം ഗഡുവും ഉൾപ്പെടെ ഒരാൾക്ക് 2,77,300/- രൂപ വീതം ഉടൻ അടയ്ക്കേണ്ടതാണ്. ബാങ്ക് മുഖേനയാണെങ്കിൽ ഓരോ കവർ നമ്പറിനും പ്രത്യേകം ലഭിക്കുന്ന ബാങ്ക് റഫറൻസ് നമ്പർ രേഖപ്പെടുത്തിയ പേ-ഇൻ സ്ലിപ്പ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ (SBI) അല്ലെങ്കിൽ യൂണിയൻ ബാങ്ക് ഓഫ് ഇന്ത്യയുടെ ഏതെങ്കിലും ബ്രാഞ്ചുകളിൽ പണമടയ്ക്കാം. ഓൺലൈൻ വഴിയാണെങ്കിൽ ഔദ്യോഗിക പോർട്ടൽ മുഖേന തുക അടക്കാവുന്നതാണ്.
സമർപ്പിക്കേണ്ട രേഖകൾ
പണമടച്ച ശേഷം താഴെ പറയുന്ന രേഖകൾ എത്രയും വേഗം ഓൺലൈനായി അപ്ലോഡ് ചെയ്യുകയോ കരിപ്പൂരിലെ സംസ്ഥാന ഹജ്ജ് കമ്മിറ്റി ഓഫീസിൽ നേരിട്ട് എത്തിക്കുകയോ ചെയ്യണം:
ഹജ്ജ് അപേക്ഷാ ഫോം.
പണമടച്ച പേ-ഇൻ സ്ലിപ്പ്.
നിശ്ചിത മാതൃകയിലുള്ള മെഡിക്കൽ സ്ക്രീനിംഗ് & ഫിറ്റ്നസ് സർട്ടിഫിക്കറ്റ് (സർക്കാർ അലോപ്പതി ഡോക്ടർ സാക്ഷ്യപ്പെടുത്തിയത്).
മറ്റ് അനുബന്ധ രേഖകൾ.
കൂടുതൽ വിവരങ്ങൾക്കായി സംസ്ഥാന ഹജ്ജ് കമ്മിറ്റിയുടെ ഔദ്യോഗിക ട്രെയിനർമാരുമായി ബന്ധപ്പെടാവുന്നതാണ്.
