വിലകുറയാൻ കാത്തിരിക്കുന്നവരുടെ നെഞ്ചിൽ തീകോരിയിട്ട് സംസ്ഥാനത്ത് സ്വർണവില സർവകാല റെക്കോഡിൽ. പവന് 680 രൂപ കൂടി 77,640 രൂപയാണ് ഇന്നത്തെ വില. ചരിത്രത്തിൽ ആദ്യമായാണ് സ്വർണവില 77,000 എന്ന നിർണായക നാഴികക്കല്ല് ഭേദിച്ചത്. ഗ്രാം വില 85 രൂപ കൂടി 9705 രൂപയായി. പണിക്കൂലിയും നികുതിയും ഉൾപ്പെടെ ഒരുപവന് 83,000 രൂപയ്ക്കു മുകളിൽ നൽകേണ്ടി വരും നിലവിൽ.
ഓഗസ്റ്റ് 22ന് 73,720 എന്ന വിലയിൽ നിന്നാണ് 10 ദിവസം കൊണ്ട് 3920 രൂപയുടെ വർധനവുണ്ടായി റെക്കോഡിട്ടത്. 18 കാരറ്റ് സ്വർണവില ഗ്രാമിന് 75 രൂപ കൂടി 8,030 രൂപയായി. ഗ്രാമിന് 8,000 രൂപ കടന്നത് ഇതാദ്യമായാണ്. ചില ജ്വല്ലറികളിൽ വില 18 കാരറ്റിന് ഗ്രാമിന് 65 രൂപ കൂടി 7,970 രൂപയാണ്.
