എറണാകുളം ആലുവയിൽ യുവതിയെ പെട്രോൾ ഒഴിച്ച് കൊല്ലാൻ ശ്രമിച്ച സംഭവത്തിൽ പ്രതി പിടിയിൽ. മുപ്പത്തടം സ്വദേശി അലിയാണ് ആലുവ പൊലീസ് അറസ്റ്റ് ചെയ്തത്. ചൂണ്ടി സ്വദേശി ടെസിയുടെ നേരെയാണ് ഇയാൾ പെട്രോൾ ഒഴിച്ചത്. തന്നെ മൊബൈലിൽ ബ്ലോക്ക് ചെയ്തതിലുള്ള വൈരാഗ്യവും വീട്ടിൽ വരരുതെന്ന് ആവശ്യപ്പെട്ടതുമാണ് യുവതിയെ ആക്രമിക്കാൻ കാരണമെന്ന് അലി പൊലീസിനോട് പറഞ്ഞത്.
ആലുവയിൽ സ്കൂട്ടറിലെത്തിയ ടെസിയെ പ്രതി ബൈക്ക് ഉപയോഗിച്ച് തടഞ്ഞു നിർത്തിയ ശേഷം ഇയാൾ യുവതിയുടെ ദേഹത്ത് പെട്രോൾ ഒഴിക്കുകയായിരുന്നു. യുവതി ഓടി രക്ഷപ്പെടാൻ ശ്രമിക്കുന്ന സിസിടിവി ദൃശ്യങ്ങൾ പുറത്തു വന്നിട്ടുണ്ട്. അക്ഷയ സെൻ്റർ നടത്തുന്നയാളാണ് അലി. ഇയാൾക്ക്കെതിരെ വധശ്രമത്തിന് പൊലീസ് കേസെടുത്തു.
