കല്പ്പറ്റ: വയനാട് ഉപതിരഞ്ഞെടുപ്പില് യുഡിഎഫ് സ്ഥാനാര്ത്ഥി പ്രിയങ്കാ ഗാന്ധിക്കൊപ്പം പ്രചാരണത്തിനായി സോണിയാ ഗാന്ധിയും എത്തുന്നു. കന്നിയങ്കത്തിന് നാമനിര്ദേശ പത്രിക സമര്പ്പിക്കാനെത്തുമ്പോള് പ്രിയങ്കയ്ക്കൊപ്പം രാഹുല് ഗാന്ധിയും സോണിയാ ഗാന്ധിയും ഉണ്ടാകും. ബുധനാഴ്ചയാണ് മൂവരും വയനാട്ടിലെത്തുക.
കല്പ്പറ്റയില് നടക്കുന്ന റോഡ് ഷോയില് മൂന്ന് പേരും പങ്കെടുക്കും. വര്ഷങ്ങള്ക്ക് ശേഷമാണ് സോണിയാ ഗാന്ധി കേരളത്തില് എത്തുന്നത്. പ്രിയങ്ക ഗാന്ധി പത്ത് ദിവസത്തോളം വയനാട്ടിലുണ്ടാകുമെന്നാണ് വിവരം. എന്നാല് സോണിയാ ഗാന്ധി എത്ര ദിവസം കേരളത്തിലുണ്ടാകുമെന്നതില് വ്യക്തതയില്ല.
റോഡ് ഷോയില് പങ്കെടുത്ത ശേഷമാകും വയനാട് കളക്ടറേറ്റില് വരണാധികാരിയായ കളക്ടര്ക്ക് മുന്നില് പ്രിയങ്ക പത്രിക സമര്പ്പിക്കുകയെന്ന് കഴിഞ്ഞ ദിവസം വയനാട് പാര്ലമെന്റ് തിരഞ്ഞെടുപ്പ് സമിതി കണ്വീനര് എ പി അനില്കുമാര് അറിയിച്ചിരുന്നു. യുഡിഎഫിന്റെ നിയോജക മണ്ഡലം കണ്വെന്ഷനുകള് പൂര്ത്തിയായിട്ടുണ്ട്. പഞ്ചായത്ത് തല കണ്വെന്ഷനുകള് ചൊവ്വാഴ്ചയോടെ പൂര്ത്തീകരിക്കാനാണ് തീരുമാനം.
