അങ്കോല (കർണാടക): ഷിരൂരില് മണ്ണിന് അടിയില്പ്പെട്ട അര്ജുനുവേണ്ടി നടത്തുന്ന തിരച്ചില് അവസാനിപ്പിച്ച് മുങ്ങല് വിദഗ്ധനായ മത്സ്യത്തൊഴിലാളി ഈശ്വര് മാല്പെ. തിരച്ചിലിലെ പ്രതിസന്ധിയെക്കുറിച്ച് ഈശ്വർ മാൽപെ വ്യക്തമാക്കിയിരുന്നു. ഇതിന് പിന്നാലെയാണ് ദൗത്യം അവസാനിപ്പിക്കാനുള്ള മാൽപെ സംഘത്തിന്റെ തീരുമാനം.
ഗംഗാവലി പുഴയിലെ ദൗത്യം അതീവ ദുഷ്കരമെന്ന് ഈശ്വർ മാൽപെ നേരത്തെ വ്യക്തമാക്കിയിരുന്നു. പുഴയുടെ അടിയില് ഒട്ടും കാഴ്ചയില്ല. സ്വന്തം റിസ്കിലാണ് പുഴയില് ഇറങ്ങുന്നതെന്നും അദ്ദേഹം മാധ്യമങ്ങളോട് പറഞ്ഞിരുന്നു.
പുഴയുടെ അടിത്തട്ടത്തില് വലിയ പാറക്കെട്ടുകളും മരങ്ങളും തടിക്കഷണങ്ങളുമുണ്ട്. തകരയുടെ ബ്ലേഡ് രണ്ടുതവണ ശരീരത്തില് തട്ടി. മൂന്ന് പോയിന്റില് തപ്പി. ഇളകിയ മണ്ണാണ് അടിയില് ഉള്ളത്. പുഴയുടെ അടിയില് വൈദ്യുതി കമ്പികളുണ്ടെന്നും അദ്ദേഹം വ്യക്തമാക്കിയിരുന്നു.
