കോഴിക്കോട്: വനിതാ ദിനത്തിൽ ആഡംബരക്കപ്പൽ യാത്രയിൽ പങ്കെടുക്കാൻ ആട്ടിൻകുട്ടിയെ വിറ്റ മറിയക്കുട്ടിക്ക് കെഎസ്ആർടിസി ബജറ്റ് ടൂറിസം സെൽ കോ–ഓർഡിനേറ്റർമാർ ആടിനെ വാങ്ങാൻ പണം നൽകി.
സമ്മാനം കിട്ടിയ പണം കൊണ്ട് മകൻ ആലിക്കുട്ടി ആടിനെ തിരിച്ചുവാങ്ങി മറിയക്കുട്ടിക്ക് നൽകി.
ഉല്ലാസ യാത്രയിൽ മറിയക്കുട്ടിക്ക് പ്രായം തടസ്സമായിരുന്നില്ല.
മക്കളെ ബുദ്ധിമുട്ടിക്കാതെ യാത്രാചെലവ് കണ്ടെത്താനാണ് കുന്ദമംഗലം പത്താംമൈൽ സ്വദേശിനിയായ മറിയക്കുട്ടി ആട്ടിൻകുട്ടിയെ വിറ്റത്. ഇനിയുള്ള എല്ലാ വനിതാ ദിനത്തിലും യാത്ര ചെയ്യാൻ ഒരുക്കമാണെന്നും മറിയക്കുട്ടി പറഞ്ഞു. അതിനായി ആട്, കോഴി, മത്സ്യം ഇവയെ വളർത്തി പണം കണ്ടെത്തുമെന്നും മറിയക്കുട്ടി വ്യക്തമാക്കി. മറിയക്കുട്ടിയുടെ ആവേശം കണ്ടാണ് ബജറ്റ് ടൂറിസം സെൽ കോ–ഓർഡിനേറ്റർമാർ ആടിനെ വാങ്ങാനുള്ള തുക സമാഹരിച്ച് മറിയക്കുട്ടിയ്ക്ക് നൽകിയത്.
