റിയാദ്: അദ്ധ്യാപകരുടെയും വിദ്യാർത്ഥികളുടെയും കായിക പ്രകടനം മെച്ചപ്പെടുത്തുന്നതിനായി 39 പരിശീലന പരിപാടികൾ ആരംഭിക്കുമെന്ന് സഊദി അറേബ്യയിലെ വിദ്യാഭ്യാസ മന്ത്രാലയം അറിയിച്ചു.
325 പൊതുവിദ്യാഭ്യാസ വിദ്യാർത്ഥികൾക്ക് പുറമേ 1,435 സ്ത്രീ-പുരുഷ ശാരീരിക വിദ്യാഭ്യാസ, കായിക പ്രവർത്തന സൂപ്പർവൈസർമാർ, ശാരീരിക ആരോഗ്യ വിദ്യാഭ്യാസ അധ്യാപകർ എന്നിവരുടെ കായിക പ്രകടനം വികസിപ്പിക്കും.
സൗദി ഒളിമ്പിക്സ് ആൻഡ് പാരാലിമ്പിക് കമ്മിറ്റി (എസ്ഒപിസി), ലീഡർഷിപ്പ് ഡെവലപ്മെന്റ് ഇൻസ്റ്റിറ്റ്യൂട്ട് (എൽഡിഐ), സഊദി ലൈഫ് സേവിംഗ് ഫെഡറേഷൻ, സഊദി അറേബ്യൻ സ്പോർട്സ് കൾച്ചർ ഫെഡറേഷൻ, ടേബിൾ ടെന്നീസ് ഫെഡറേഷൻ എന്നിവയുടെ സഹകരണത്തോടെ 11 മേഖലകളിലും ഗവർണറേറ്റുകളിലും പരിശീലന പരിപാടികൾ നടപ്പാക്കുമെന്ന് മന്ത്രാലയം അറിയിച്ചു.
ഈ അധ്യയന വർഷത്തിലെ രണ്ടും മൂന്നും സെമസ്റ്ററുകളിൽ നേരിട്ടും വിദൂരമായും മന്ത്രാലയം നടത്തുന്ന പ്രോഗ്രാമുകളും പരിശീലന കോഴ്സുകളും കായിക പ്രവർത്തനങ്ങളുടെ പരിശീലനം വർദ്ധിപ്പിക്കാൻ ലക്ഷ്യമിടുന്നുണ്ട്.
വിവിധ കായിക മേഖലകളിലെ വിദ്യാഭ്യാസ സൂപ്പർവൈസർമാരുടെയും അധ്യാപകരുടെയും കഴിവുകൾ വികസിപ്പിക്കുന്നതിനൊപ്പം കായിക സംസ്കാരം പ്രചരിപ്പിക്കാനും കഴിവുകളെ കണ്ടെത്താനും ഇത് സഹായിക്കും.
കോഴ്സുകളിൽ കായിക പ്രതിഭകളെ കണ്ടെത്തുന്നതിനൊപ്പം ടേബിൾ ടെന്നിസിന്റെ ആമുഖവും സംഘാടനവും ഉൾപ്പെടുന്നുവെന്ന് മന്ത്രാലയം കൂട്ടിച്ചേർത്തു. സ്കൂൾ കായിക പ്രവർത്തനങ്ങളുമായി ബന്ധപ്പെട്ട് ശാരീരികവും ആരോഗ്യപരവുമായ വിദ്യാഭ്യാസ അധ്യാപകർക്കുള്ള കോഴ്സിന് പുറമേ, ജീവൻ രക്ഷിക്കുന്നതിലും ജലസുരക്ഷയിലും പ്രാഥമിക കഴിവുകളും പരിപാടിയിൽ ഉൾപ്പെടും.
