റിയാദ്: മറ്റുള്ളവരുടെ വികാരങ്ങൾ കണക്കിലെടുക്കാതെ പൊതുസ്ഥലങ്ങളിൽ ഉച്ചത്തിൽ സംസാരിക്കുന്നവരുടെ ലംഘനവും പൊതു അഭിരുചി നിയന്ത്രണ സംവിധാനത്തിന്റെ പ്രയോഗവും പബ്ലിക് ടേസ്റ്റ് അസോസിയേഷൻ വൈസ് പ്രസിഡന്റ്കൗൺസിലർ ഡോ: ഖാലിദ് അൽ അബ്ദുൽകരീം വെളിപ്പെടുത്തി.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
നിയമ ലംഘനത്തിന് 100 റിയാൽ മുതൽ പിഴ ചുമത്തും. കുറ്റം ആവര്ത്തിക്കുന്നതിനനുസരിച്ച് പിഴയും കൂടും. ഇതുള്പ്പെടെ പൊതുസ്ഥലങ്ങളില് പാലിക്കേണ്ട മര്യാദകളും നിയമലംഘനങ്ങളും അടങ്ങിയ നിയമ ഭേദഗതിക്ക് നേരത്തെ സഊദി മന്ത്രിസഭ അംഗീകാരം നൽകിയിരുന്നു. ശൂറാ കൗൺസിലിന്റെയും വിദഗ്ധ സമിതിയുടെയും അംഗീകാരത്തോടെ ആരംഭിച്ച് നിരവധി ഘട്ടങ്ങളിലൂടെ കടന്നുപോയ പൊതു അഭിരുചിയുടെ ലംഘനങ്ങളുടെ പട്ടികയ്ക്ക് മന്ത്രിമാരുടെ കൗൺസിൽ അംഗീകാരം നൽകിയതായി അൽ അബ്ദുൽകരീം പ്രാദേശിക മാധ്യമത്തിന് നൽകിയ ആഭിമുഖത്തിൽ പറഞ്ഞു.
സന്ദർശകരെ ഉപദ്രവിക്കുന്നതോ ഭയപ്പെടുത്തുന്നതോ അവരെ അപകടപ്പെടുത്തുന്നതോ ആയ വാക്ക് ഉപയോഗിക്കുകയോ അല്ലെങ്കിൽ പൊതുസ്ഥലങ്ങളിൽ അത്തരം പ്രവൃത്തി ചെയ്യുകയോ ചെയ്യുന്നത് പൊതു അഭിരുചിയുടെ ലംഘനമായി കണക്കാക്കുകയും അതിന് 100 റിയാൽ മുതൽ പിഴ ചുമത്തുകയും ചെയ്യുമെന്നും അദ്ദേഹം കൂട്ടിച്ചേർത്തു.
കഴിഞ്ഞ ദിവസങ്ങളിൽ റിയാദിൽ ഉച്ചത്തിൽ സംസാരിച്ചതിന് സ്വദേശിക്കെതിരെ നടപടികൾ സ്വീകരിച്ചിരുന്നു. ആളുകളെ ദ്രോഹിക്കുകയും അവരെ ശല്യപ്പെടുത്തുകയും അവരുടെ സമാധാനത്തിന് ഭംഗം വരുത്തുകയും ചെയ്യുന്ന വാക്കുകളും പ്രവൃത്തികളും അവരുടെ വികാരങ്ങൾ കണക്കിലെടുക്കാതെ ആവർത്തിക്കുന്നതായി കണ്ടെത്തിയെന്നും ഇത് പൊതു അഭിരുചി ലംഘനമാണെന്നും അദ്ദേഹം പറഞ്ഞു.പൊതു അഭിരുചിയുടെ എല്ലാ മൂല്യങ്ങളും മര്യാദകളും ഇസ്ലാമിക അധ്യാപനത്തിന്റെ പ്രധാന ഉറവിടമാണെന്ന് അറിയാതെ എന്ത് അടിസ്ഥാനത്തിലാണ് ഈ ലംഘനം കണ്ടെത്തിയതെന്ന് പലരും ആശ്ചര്യപ്പെടുന്നതായി അദ്ദേഹം സൂചിപ്പിച്ചു.
നിഷേധാത്മക പെരുമാറ്റങ്ങൾ തടയുന്നതിനും സമൂഹത്തിൽ പൊതു അഭിരുചിയുടെ സംസ്കാരം പ്രചരിപ്പിക്കുന്നതിനുമായി ആഭ്യന്തര മന്ത്രാലയം നൽകുന്ന വിവിധ മാർഗങ്ങളിലൂടെ പൊതു അഭിരുചിയുടെ ലംഘനം ശ്രദ്ധയിൽ പെട്ടാൽ ബന്ധപ്പെട്ട അധികാരികളെ അറിയിക്കാൻ അൽ അബ്ദുൽക്കരിം ആവശ്യപ്പെട്ടു.
ഏതാനും ദിവസങ്ങൾക്കു മുമ്പ് തലസ്ഥാന നഗരിയിൽ പൊതുസ്ഥലത്തു വെച്ച് ഉച്ചത്തിൽ സംസാരിക്കുകയും പൊതുമര്യാദക്കും സഭ്യതക്കും നിരക്കാത്ത നിലക്ക് പെരുമാറുകയും ചെയ്ത സഊദി യുവാവിനെ അറസ്റ്റ് ചെയ്തതായി റിയാദ് പോലീസ് അറിയിച്ചിരുന്നു. യുവാവ് പൊതുസ്ഥലത്തു വെച്ച് ഉച്ചത്തിൽ സംസാരിക്കുകയും പൊതുമര്യാദക്കും സഭ്യതക്കും നിരക്കാത്ത നിലക്ക് പെരുമാറുകയും ചെയ്യുന്നതിന്റെ ദൃശ്യങ്ങൾ അടങ്ങിയ വീഡിയോ സാമൂഹികമാധ്യമങ്ങളിൽ പ്രചരിച്ചതിന് പിന്നാലെയാണ് ഇത് ശ്രദ്ധയിൽ പെട്ട് അന്വേഷണം നടത്തി നിയമ ലംഘകനെ തിരിച്ചറിഞ്ഞത്. പ്രതിക്കെതിരെ നിയമാനുസൃത നടപടികൾ സ്വീകരിച്ചതായി റിയാദ് പോലീസ് പറഞ്ഞു.
അനുമതി ഇല്ലാതെ മറ്റുള്ളവരുടെ ഫോട്ടോ എടുക്കുക, മുതിര്ന്നവര്ക്കായി നീക്കി വെച്ച സീറ്റുകളില് ഇരിക്കുക, സ്ത്രീകള്ക്കായി നീക്കിവെച്ച സ്ഥലങ്ങളില് പുരുഷന്മാര് പോകുക, സമീപത്തുള്ളവര്ക്ക് പ്രയാസമാകും വിധം ഉച്ചത്തില് മ്യൂസിക് പ്ലേ ചെയ്യുക തുടങ്ങിയവ ഉള്പ്പെടെ 20 നിയമലംഘനങ്ങള് ആണ് ഉള്ളത്.
نائب رئيس جمعية #الذوق_العام: لهذه الأسباب يعاقب من يرفع صوته بـ #الأماكن_العامةhttps://t.co/jwqttEj2DF pic.twitter.com/0cxFmVeES5
— أخبار 24 (@Akhbaar24) August 14, 2022
പൊതു അഭിരുചിയുടെ ലംഘനങ്ങളുടെ പട്ടിക പിന്നീട് കഴിഞ്ഞ വർഷം ഫെബ്രുവരിയിൽ വിപുലീകരിച്ചിരുന്നു. പട്ടികയിലെ 20-ാമത്തെ നിയമലംഘനമായി പള്ളികളിലും സർക്കാർ ഏജൻസികളിലും വകുപ്പുകളിലും ഷോർട്ട്സ് ധരിക്കുന്ന എല്ലാവർക്കും 250-500 റിയാൽ പിഴ ഉൾപ്പെടുത്തിയാണ് പൊതു അഭിരുചി പട്ടിക അവസാനമായി ഭേദഗതി ചെയ്തത്. എന്നാൽ, മസ്ജിദുകൾക്കും സർക്കാർ ഓഫീസുകൾക്കും പുറത്ത് പൊതുസ്ഥലങ്ങളിൽ ഷോർട്സ് ധരിക്കുന്നത് പിഴ ലഭിക്കുന്ന നിയമ ലംഘനമല്ല.
പൊതുഅഭിരുചി സംരക്ഷണ നിയമാവലി 2019 നവംബറിലാണ് ആഭ്യന്തര മന്ത്രി അബ്ദുൽ അസീസ് ബിൻ സഊദ് രാജകുമാരന്റെ അംഗീകാരത്തോടെ പ്രാബല്യത്തിൽവന്നത്. നിയമാവലിയിൽ നിർണയിച്ച നിയമ ലംഘനങ്ങൾക്ക് 50 റിയാൽ മുതൽ 6,000 റിയാൽ വരെ പിഴ ലഭിക്കും. ജനവാസ കേന്ദ്രങ്ങളിൽ ഉച്ചത്തിൽ സംഗീതം വെക്കൽ, വളർത്തുമൃഗങ്ങളുടെ മാലിന്യങ്ങൾ നീക്കം ചെയ്യാതിരിക്കൽ, സഭ്യതക്ക് നിരക്കാത്ത വസ്ത്രങ്ങൾ ധരിക്കൽ, അസഭ്യമായ പെരുമാറ്റം എന്നിവയെല്ലാം നിയമാവലി അനുസരിച്ച് പിഴ ലഭിക്കുന്ന നിയമ ലംഘനങ്ങളാണ്.
പൊതുസ്ഥലങ്ങളില് മാന്യമായ വസ്ത്രം ധരിക്കാതിരിക്കുന്നതും, മറ്റുള്ളവരോട് മോശമായി സംസാരിക്കുന്നതും, പൊതുസ്ഥലങ്ങളിലും വാഹനങ്ങളിലും അനുമതി ഇല്ലാതെ എഴുതുന്നതും വരയ്ക്കുന്നതും, സഭ്യമല്ലാത്ത സംസാരങ്ങളും, എഴുത്തുകളും ചിത്രങ്ങളുമെല്ലാം നിയമലംഘനമാണ്. സ്ത്രീകള്ക്ക് പര്ദ നിര്ബന്ധമല്ലെങ്കിലും മാന്യമായ വസ്ത്രം നിർബന്ധമാണ്. രാജ്യത്തിന്റെയും മതത്തിന്റെയും സംസ്കാരവും പാരമ്പര്യവും കാത്ത് സൂക്ഷിക്കാന് എല്ലാ പൗരന്മാരും ബാധ്യസ്ഥരാണ്.
