സ്ത്രീകൾ മുടിയും കഴുത്തും മറക്കണമെന്ന് സിവിൽ അഫയേഴ്സ് വിഭാഗം
ജിദ്ദ: സിവിൽ സ്റ്റാറ്റസ് നിയമത്തിലെ എക്സിക്യൂട്ടീവ് ചട്ടങ്ങളിലെ പുതിയ ഭേദഗതികൾ അനുസരിച്ച് സഊദി അറേബ്യയിലെ പൗരന്മാർക്ക് നൽകുന്ന ദേശീയ ഐഡി കാർഡുകളിൽ മുഴുവൻ പേരും ഇംഗ്ലീഷിലും പ്രദർശിപ്പിക്കും.
വാർത്തകൾ നേരിട്ട് ഉടൻ ലഭിക്കാൻ ഇവിടെ ക്ലിക്ക് ചെയ്യുക
ഹിജ്റി, ഗ്രിഗോറിയൻ തീയതികൾ അനുസരിച്ച് ജനനത്തീയതിയും കാർഡിന്റെ കാലാവധിയും ദേശീയ ഐഡിയിൽ ഉൾപ്പെടുത്തണമെന്നും പുതിയ ഭേദഗതികൾ ആവശ്യപ്പെടുന്നു. ഇത് സംബന്ധിച്ച ഭേദഗതി വെള്ളിയാഴ്ച ഉമ്മുൽ-ഖുറ ദിനപത്രത്തിൽ പ്രസിദ്ധീകരിച്ചു. ഭേദഗതികളിൽ നിയന്ത്രണത്തിന്റെ 4 കാര്യങ്ങൾ ആണ് ഉൾപ്പെടുന്നത്, അതിൽ ഏറ്റവും പ്രധാനപ്പെട്ടത് പ്രിന്റ്, ഡിജിറ്റൽ പതിപ്പുകളിൽ ദേശീയ ഐഡന്റിറ്റിയിൽ എന്ത് അടങ്ങിയിരിക്കണമെന്ന വ്യവസ്ഥകളാണ്.
കുടുംബ രേഖകൾ, ജനന സർട്ടിഫിക്കറ്റുകൾ, മരണ സർട്ടിഫിക്കറ്റുകൾ തുടങ്ങി എല്ലാ സിവിൽ സ്റ്റാറ്റസ് ഡോക്യുമെന്റുകളും പ്രിന്റ് ചെയ്തതും ഡിജിറ്റലും നൽകുന്നതും ഭേദഗതികൾ ഉൾക്കൊള്ളുന്നു.
ദേശീയ ഐഡന്റിറ്റി പ്രൂഫ് ആവശ്യമുള്ള സർക്കാർ, സർക്കാരിതര ഏജൻസികൾ ഐഡിയുടെ ഫോട്ടോകോപ്പികൾ എടുക്കരുതെന്നും നിയമം ഊന്നിപ്പറഞ്ഞു. അവർക്ക് ആവശ്യമായ വിവരങ്ങൾ രേഖപ്പെടുത്താം. ദേശീയ ഐഡന്റിറ്റിയുടെയും അത് നൽകുന്ന മറ്റ് രേഖകളുടെയും സാധുതയ്ക്ക് സിവിൽ സ്റ്റാറ്റസ് അതോറിറ്റി ഉത്തരവാദിയാണ്.
ഐഡിയിലെ വ്യക്തിഗത ചിത്രത്തിനായി നിരവധി നിബന്ധനകളും സജ്ജീകരിച്ചിരിക്കുന്നു. ഫോട്ടോ പുതിയതും വെളുത്ത പശ്ചാത്തലത്തിൽ നിറമുള്ളതും എല്ലാ മുഖ സവിശേഷതകളും വ്യക്തവും വെളിപ്പെടുത്തുന്നതും ആയിരിക്കണം. കണ്ണടകളോ നോൺ-മെഡിക്കൽ ലെൻസുകളോ ഇല്ലാത്തതും അലങ്കാരങ്ങളില്ലാത്തതുമായിരിക്കണമെന്നതാണ് നിബന്ധനകൾ.
അതേസമയം, സഊദിയിലെ സ്ത്രീകൾ അവരുടെ തിരിച്ചറിയൽ കാർഡുകളിലെ ഫോട്ടോകളിൽ മുടിയും കഴുത്തും മറച്ചു കൊണ്ടായിരിക്കണമെന്ന് സിവിൽ അഫയേഴ്സ് വിഭാഗം ആവർത്തിച്ചു. സഊദി അറേബ്യയിലെ സ്ത്രീകൾക്ക് സിവിൽ സ്റ്റാറ്റസ് ഐ.ഡി കാർഡ് ഫോട്ടോകളിൽ മുടിയോ കഴുത്തോ കാണിക്കാമെന്ന ധാരണ ശരിയല്ലെന്ന് സഊദി സിവിൽ സ്റ്റാറ്റസ് ഡിപ്പാർട്ട്മെന്റ് വക്താവ് മുഹമ്മദ് അൽ ജാസിർ വ്യക്തമാക്കി.
സ്ത്രീകൾക്ക് ഫോട്ടോ എടുക്കുമ്പോൾ മുടിയും കഴുത്തും കാണിക്കാമെന്ന തരത്തിലുള്ള തെറ്റായ പ്രചാരണം അടിസ്ഥാനരഹിതമാണ്. സിവിൽ സ്റ്റാറ്റസ് കാർഡുകളിലെ ഫോട്ടോകളിൽ സ്ത്രീകൾ മുടിയും കഴുത്തും മറക്കണം എന്നത് നേരത്തേയുള്ള വ്യവസ്ഥയാണ്. 10നും 14നും ഇടയിൽ പ്രായമുള്ളവരും ഐ.ഡി കാർഡുകളെടുക്കുമ്പോൾ സിവിൽ നിയമങ്ങൾ പാലിക്കാൻ ബാധ്യസ്ഥരാണെന്നും അദ്ദേഹം ഉണർത്തി.
സഊദി പുരുഷന്റെ തിരിച്ചറിയൽ കാർഡിന്റെ ഫോട്ടോ സൗദി പാരമ്പര്യ വസ്ത്രത്തിലായിരിക്കണം. അതിൽ ‘ഷെമാഗും ഗുത്രയും’ ഉൾപ്പെടുന്നു. സ്ത്രീക്ക് തിരിച്ചറിൽ കാർഡിനുള്ള ഫോട്ടോ മുടിയും കഴുത്തും മറച്ചു കൊണ്ടുള്ള വേഷമാണ്. അവരുടെ പർദയുടെ കളറിൽ പ്രത്യേക നിറം വ്യവസ്ഥ ചെയ്തിട്ടില്ല എന്നും സിവിൽ അഫയേഴ്സ് ട്വീറ്റ് ചെയ്തു.
