ദുബൈ: സഊദി ദേശീയ എണ്ണകമ്പനിയായ സഊദി അരാംകോ ഏഷ്യൻ രാജ്യങ്ങൾക്ക് നൽകുന്ന ക്രൂഡ് എണ്ണയുടെ വില ഉയർത്തി. ക്രൂഡിന്റെ ഏപ്രിൽ ഔദ്യോഗിക വിൽപന വിലയാണ് വർധിപ്പിച്ചത്. ഇതോടെ ചില ഗ്രേഡുകൾ എക്കാലത്തെയും ഉയർന്ന നിരക്കിലെത്തി. ചരക്ക് നിരക്ക് കുതിച്ചുയരുന്നതും യൂറോപ്പ്, ആഫ്രിക്ക, അമേരിക്ക എന്നിവിടങ്ങളിൽ നിന്നുള്ള സപ്ലൈകളെ ഏഷ്യയുടെ പരിധിയിൽ നിന്ന് അകറ്റിയതിനാൽ മിഡിൽ ഈസ്റ്റിലെ എണ്ണ ആവശ്യകതയിൽ പ്രതീക്ഷിക്കുന്ന വർധനയുടെ പശ്ചാത്തലത്തിലാണ് സഊദി ക്രൂഡ് വില റെക്കോർഡ് നേട്ടത്തിലേക്ക് നയിച്ചത്.
2008 ന് ശേഷമുള്ള ഏറ്റവും ഉയർന്ന നിരക്കിലേക്ക് ആഗോള എണ്ണവില ഇപ്പോൾ കുതിച്ചുയർന്നിട്ടുണ്ട്. ഇത് പണപ്പെരുപ്പത്തിന്റെ ആശങ്ക വർദ്ധിപ്പിക്കുന്നു. റഷ്യയുടെ ഉക്രൈൻ അധിനിവേശത്തെ തുടർന്ന് റഷ്യയുടെ എണ്ണ ഇറക്കുമതി നിരോധിക്കാൻ അമേരിക്കയും യൂറോപ്യൻ രാജ്യങ്ങളും ശ്രമം നടത്തുകയാണ്.
ലോകത്തിലെ മുൻനിര എണ്ണ കയറ്റുമതിക്കാരായ സഊദി അരാംകോ ഏഷ്യയിലേക്കുള്ള മുൻനിര അറബ് ലൈറ്റ് ക്രൂഡ് വില ബാരലിന് 4.95 യുഎസ് ഡോളറായി ഉയർത്തി. ഡിഎംഇ ഒമാൻ, പ്ലാറ്റ്സ് ദുബായ് ക്രൂഡ് വിലയുടെ ശരാശരി 2.15 യുഎസ് ഡോളർ ഉയർന്നതായി സഊദി അരാംകോ വ്യക്തമാക്കി.ഏഷ്യയിലെ അറബ് മീഡിയം, അറബ് ഹെവി ക്രൂഡ് എന്നിവയുടെ ഏപ്രിൽ ഒഎസ്പികളും എക്കാലത്തെയും ഉയർന്ന നിരക്കാണ്.
